Паўночна-Балтыйская васьмёрка: Лукашэнка па-ранейшаму пазбаўлены дэмакратычнай легітымнасці

26 студзеня, Позірк. Паўночныя і балтыйскія краіны “падтрымліваюць заяву вярхоўнага прадстаўніка ЕС па замежных справах і палітыцы бяспекі Каі Калас аб падтрымцы беларускага народа“.

У дакуменце, апублікаваным 26 студзеня Паўночна-Балтыйскай васьмёркай (Nordic-Baltic Eight, NB8), адзначаецца, што краіны-ўдзельніцы “салідарныя з беларускім народам, які імкнецца да свабоднай, дэмакратычнай, суверэннай і незалежнай Беларусі“. Канстатуецца, што “будучая дэмакратычная Беларусь мае месца ў еўрапейскай сям’і. Нашы краіны будуць працягваць падтрымліваць нястомныя намаганні беларускіх дэмакратычных сіл на чале са Святланай Ціханоўскай і незалежнай беларускай грамадзянскай супольнасці як унутры, так і за межамі Беларусі“.

Падкрэсліваецца, што краіны Паўночнай Еўропы і Балтыі “працягваюць падтрымліваць дэмакратычнае права беларускага народа выбіраць сваіх лідараў шляхам свабодных і справядлівых выбараў. Яго сапраўднымі дэмакратычнымі ўмовамі з’яўляюцца вяршэнства закона, палітычны плюралізм і поўная павага правоў чалавека і асноўных свабод. Нічога з гэтага, на жаль, не назіраецца ў сённяшняй Беларусі”.

“Наадварот, — гаворыцца ў дакуменце, — бесперапынны і беспрэцэдэнтны ўзровень рэпрэсій, уключаючы адвольныя затрыманні і катаванні, масавыя парушэнні правоў чалавека, жорсткія абмежаванні на ўдзел у палітычным жыцці для апанентаў рэжыму і вельмі абмежаваны доступ да незалежных СМІ пазбавілі працэс, які адбыўся сёння, якой-небудзь легітымнасці. Гэта таксама знайшло адлюстраванне ў рашэнні ўладаў Беларусі запрасіць місію БДІПЧ АБСЕ ўсяго за 10 дзён да пачатку выбараў“.

Паўночна-Балтыйская васьмёрка настойліва заклікала да “неадкладнага і безумоўнага вызвалення ўсіх палітычных зняволеных і іх эфектыўнай рэабілітацыі“ і канстатавала, што Аляксандр Лукашэнка “па-ранейшаму пазбаўлены якой-небудзь дэмакратычнай легітымнасці”.

Паўночна-Балтыйская васьмёрка — рэгіянальны фармат супрацоўніцтва, у які ўваходзяць Данія, Ісландыя, Латвія, Літва, Нарвегія, Фінляндыя, Швецыя і Эстонія. У рамках васьмёркі рэгулярна праходзяць сустрэчы прэм’ер-міністраў, міністраў замежных спраў і спікераў парламентаў згаданых краін.

22 снежня 2021 года міністры замежных спраў згаданых краін абмеркавалі палітычную сітуацыю ў Беларусі.