У Асіповіцкім раёне прайшлі вучэнні з выкарыстаннем РСЗА “Паланэз” і “БелГрад”

2 лютага, Позірк. Вучэнні з падраздзяленнямі рэактыўных сістэм залпавага агню прайшлі ў Асіповіцкім раёне (Магілёўская вобласць), паведамляе тэлеканал Міністэрства абароны “ВаенТВ”.

Адзначаецца, што “баявыя разлікі выканалі задачу па падрыхтоўцы пазіцый і нанясенні удараў па ўмоўным непрыяцелю”.

У вучнях былі выкарыстаныя ракетныя сістэмы залпавага агню “Паланэз”. Раней беларускія вайскоўцы здзейснілі баявыя пускі з гэтых РСЗА “на расійскім палігоне ў рамках кантрольных заняткаў”, гаворыцца ў сюжэце тэлеканала.

Таксама паведамляецца аб выкарыстанні на вучэннях РСЗА “БелГрад”. Заяўляецца, што гэта “ўдасканалены ўзор савецкага комплексу [“Град”], распрацоўкай і стварэннем якога займаліся айчынныя спецыялісты”.

“БелГрад” у параўнанні са “сваім папярэднікам” мае шэраг адрозненняў, адзначаецца ў паведамленні. У прыватнасці, яго баявая частка грунтуецца на аўтамабілях МАЗ (раней выкарыстоўваліся расійскія “Уралы”).

У тэлесюжэце гаворыцца, што “БелГрад” здольны несці да 100 зарадаў, далёкасць стральбы гэтага РСЗА складае 20,6 кіламетраў.