Віцебская вобласць зноў дазволіла фізічным асобам неабмежавана вывозіць у Літву і Латвію тавары для асабістых патрэб

6 лютага, Позірк. Пастановай № 39 ад 28 студзеня 2025 года Віцебскі абласны выканаўчы камітэт зняў абмежаванні на вываз фізічнымі асобамі ў сумежныя краіны Еўрасаюза тавараў для асабістых патрэб.

Дакумент апублікаваны на Нацыянальным прававым інтэрнэт-партале, ён будзе дзейнічаць да 31 снежня 2025 года.

У пастанове гаворыцца аб зняцці забароны на вываз фізічнымі асобамі прадукцыі “за межы мытнай тэрыторыі Еўразійскага эканамічнага саюза тавараў для асабістага карыстання <…> у выпадку іх вывазу з Рэспублікі Беларусь у Латвійскую Рэспубліку, Літоўскую Рэспубліку”.

Раней Віцебскі аблвыканкам прымаў аналагічнае рашэнне 2 лютага 2024-га, яно таксама дзейнічала да канца года.

Такім жа чынам здымалі абмежаванні ў Брэсцкай вобласці.

17 студзеня паведамлялася аб чарговым скасаванні забароны да канца 2025-га ў Гродзенскай вобласці.

Забарона на вываз у краіны ЕС пэўных тавараў для асабістага карыстання замацаваная пастановай Савета міністраў № 224 ад 12 красавіка 2022 года “Аб мерах па абароне ўнутранага рынку”.

Гэта пастанова забараняе вывозіць за межы Еўразійскага эканамічнага саюза больш за 2 кілаграмы пшанічнай мукі, 1 кг грачанай, рысавай, аўсянай, маннай, пярловай круп, проса, аўсяных шматкоў, макаронных вырабаў, солі і цукру, звыш 1 літра расліннага алею, больш за 3 слоікі мясных, рыбных і малочных кансерваў (акрамя дзіцячага харчавання). Абмежаванне не тычыцца тавараў, набытых у крамах бяспошліннага гандлю і “іншых месцах або выпадках, вызначаных аблвыканкамамі”.

На падставе рашэння Аляксандра Лукашэнкі, да канца 2025 года жыхарам Польшчы, Літвы, Латвіі, а таксама яшчэ 35 дзяржаў Еўропы дазволена наведваць Беларусь у бязвізавым парадку. Улады суседніх краін заклікаюць сваіх грамадзян не рабіць гэтага з меркаванняў бяспекі.

У красавіку 2022 года, неўзабаве пасля прыняцця ўрадам абмежавальнай пастановы Савета міністраў, Аляксандр Лукашэнка заявіў, што жыхары суседніх краін ЕС “стаяць уздоўж мяжы” і “просяць купіць хаця б грэчкі і солі”.

Пазней ён ізноў выкарыстаў гэтую сумнеўную інфармацыю, каб вытлумачыць, чаму, на яго думку, улады суседніх еўрапейскіх краін перашкаджаюць выезду сваіх грамадзян у Беларусь: “Чаму? Таму што едуць людзі да нас, набываюць соль. У іх няма солі! Вялікі, багаты Захад, а солі няма!”

“І каб людзі не казалі пра тое, што беларусы нармальна жывуць, яны іх проста не выпускаюць. Вось і ўся дэмакратыя!” — сцвярджаў Лукашэнка.