Супрацоўнікі ДАІ са стралянінай спынялі парушальніка ў Магілёўскай вобласці, ён затрыманы

9 лютага, Позірк. Супрацоўнікі ДАІ са стралянінай спынялі парушальніка ў Чэрыкаўскім раёне Магілёўскай вобласці, паведамляе прэс-служба МУС.

Паведамляецца, што ў райцэнтры Mercedes сутыкнуўся са стаячым аўтамабілем Lada і з’ехаў з месца ДТЗ. Супрацоўнікі ДАІ знайшлі транспартны сродак і падалі сігнал аб спыненні.

“Аднак вадзіцель праігнараваў патрабаванне і паспрабаваў уцячы. Пачаўся пераслед. Аўта разганялася да 140 км/г, ствараючы рэальную пагрозу іншым удзельнікам дарожнага руху. Інспектары прынялі рашэнне выкарыстоўваць табельную зброю. Пасля прыцэльных стрэлаў па колах парушальніка затрымалі”, — гаворыцца ў рэлізе.

Удакладняецца, што за рулём знаходзіўся “30-гадовы раней неаднаразова судзімы магіляўчанін, які не мае права кіравання (не атрымліваў), з візуальнымі прыкметамі ап’янення”. Агляд паказаў больш за 1,1 праміле алкаголю ў крыві.

У адносінах да вадзіцеля складзена 15 адміністрацыйных пратаколаў, у тым ліку за нецвярозае кіраванне, невыкананне неаднаразовых патрабаванняў аб спыненні і непадпарадкаванне, сказана ў паведамленні.

Ён змешчаны ў ІЧУ, транспартны сродак дастаўлены на ахоўную стаянку.