Жыхара Гомеля будуць судзіць за жорсткае забойства цяжарнай жонкі
19 кастрычніка, Позірк. Пракуратура накіравала ў суд крымінальную справу ў дачыненні да 27-гадовага жыхара Гомеля, які абвінавачваецца ў катаванні цяжарнай жонкі і яе наступным забойстве з асаблівай жорсткасцю. Пра гэта паведамляе прэс-служба нагляднага ведамства.
Паводле даных пракуратуры, са жніўня 2025 года па сакавік 2026-га мужчына сістэматычна збіваў жонку, у тым ліку па месцы жыхарства сваякоў і знаёмых, а таксама на працы. Ён, як адзначаецца, “наносіў ёй удары па галаве і цягаў за валасы”. Пры гэтым фігурант ведаў, што жанчына цяжарная.
У канцы сакавіка 2026 года ў здымнай кватэры мужчына, які знаходзіўся ў стане алкагольнага ап’янення і пад уздзеяннем псіхатропных рэчываў, нанёс жонцы “не менш за 35 удараў рукамі, нагамі і тупымі прадметамі па розных частках цела”. Каля 12 удараў прыйшліся па галаве.
Жанчына памерла на месцы здарэння. На момант забойства тэрмін яе цяжарнасці складаў не менш за 10 тыдняў.
Абвінавачанаму інкрымінаваныя катаванне і забойства з асаблівай жорсткасцю (адпаведна ч. 2 арт. 154 і п. 3 і 6 ч. 2 арт. 139 КК). Ён знаходзіцца пад вартай.
Санкцыя ч. 2 арт. 139 КК прадугледжвае за забойства пры абцяжваючых абставінах ад 8 да 25 гадоў пазбаўлення волі, пажыццёвае зняволенне або смяротнае пакаранне.
Да такіх абставінаў адносяцца, у прыватнасці, забойства цяжарнай і забойства з асаблівай жорсткасцю.
За катаванне цяжарнай (ч. 2 арт. 154 КК) прадугледжана абмежаванне волі на тэрмін ад аднаго года да трох гадоў альбо пазбаўленне волі на тэрмін ад аднаго года да пяці гадоў.
Выпадкі хатняга гвалту рэгулярна трапляюць у беларускія крымінальныя зводкі. 16 кастрычніка “Позірк” паведамляў пра прысуд мінчуку, які збіваў сужыцельку, душыў яе кабелем зараднай прылады і пагражаў нажом. Мужчыну прызначана два гады абмежавання волі.
15 кастрычніка стала вядома пра крымінальную справу супраць жыхаркі Івацэвічскага раёна (Брэсцкая вобласць), якую абвінавачваюць у катаванні 78-гадовай маці. Паводле даных пракуратуры, жанчына неаднаразова збівала маці з сакавіка па верасень 2026 года.
29 верасня паведамлялася, што ў Івацэвіцкім раёне ў 2026 годзе без заяў пацярпелых ад супрацьпраўных дзеянняў пракуратура распачала 6 крымінальных спраў прыватна-публічнага і прыватнага абвінавачання: пра пагрозу забойствам, катаванне і наўмыснае прычыненне лёгкага цялеснага пашкоджання паводле арт. 186, 154 і 153 КК.
Яшчэ ў дачыненні да 52 мясцовых жыхароў распачаты адміністрацыйны працэс за гвалтоўныя дзеянні ў дачыненні да блізкіх сваякоў, членаў сям’і або былых членаў сям’і. Яны асуджаныя паводле арт. 10.1 КаАП (наўмыснае прычыненне цялеснага пашкоджання).
У Беларусі няма закона аб супрацьдзеянні хатняму гвалту. Праект адпаведнага дакумента распрацоўваўся некалькі разоў. У кастрычніку 2018 года чарговы варыянт рэзка раскрытыкаваў Аляксандр Лукашэнка, назваўшы яго “дурасцю, узятай найперш з Захаду”.
