13 лютага, Позірк. 2024 год быў адзначаны “зніжэннем аб’ёмаў узаемнага гандлю” паміж Беларуссю і Паўночнай Асеціяй (РФ), паведаміў намеснік прэм’ер-міністра Віктар Каранкевіч на сустрэчы 13 лютага з дэлегацыяй гэтага расійскага рэгіёну.
Асяцінскую дэлегацыю падчас візіту ў Мінск узначальвае кіраўнік рэспублікі Сяргей Мяняйла, вынікае з паведамлення прэс-службы беларускага ўрада.
“Перад намі стаіць задача выйсці на станоўчы трэнд [узаемнага гандлю] і забяспечыць далейшую паступальную працу”, — заявіў Каранкевіч, не прывёўшы ніякіх лічбаў.
“Упэўнены, што гэты візіт, шэраг сустрэч, перамоў і наведванні буйных прамысловых прадпрыемстваў Рэспублікі Беларусь, нададуць дадатковы імпульс развіццю адносін паміж нашымі рэспублікамі”, — дадаў віцэ-прэм’ер.
Беларускія прадпрыемствы, паводле яго слоў, гатовыя задаволіць патрэбнасць Паўночнай Асеціі ў “пасажырскай, грузавой, камунальнай, дарожна-будаўнічай, кар’ернай тэхніцы і арганізаваць яе суправаджэнне з якасным гарантыйным і сэрвісным абслугоўваннем, рамонтам на месцы эксплуатацыі”.
Візіт дэлегацыі Рэспублікі Паўночная Асеція-Аланія ў Беларусь праходзіць з 11 па 14 лютага.
