1 сакавіка, Позірк. Чарговае пасяджэнне па справе грамадзяніна Японіі Наканісі Масатосі, які абвінавачваецца паводле арт. 3581 КК (агентурная дзейнасць), адбудзецца 10 сакавіка — роўна праз два месяцы пасля таго, як працэс пачаўся ў Мінскім гарадскім судзе.
Згодна з раскладам электроннага судаводства, наступнае слуханне пройдзе ў закрытым рэжыме. Справу па-ранейшаму разглядае суддзя Анжэла Касцюкевіч, якая раней вынесла шэраг палітычна матываваных выракаў.
Наканісі Масатосі затрымалі ў ліпені 2024 года, пра што стала вядома 5 верасня ў рэпартажы “Правал “самурая” з Токіа” на тэлеканале “Беларусь 1”.
Начальнік Следчага ўпраўлення КДБ Канстанцін Бычак сцвярджаў, што замежнік, знаходзячыся на тэрыторыі Беларусі, ажыццяўляў збор і перадачу на адрас японскай спецслужбы “выведніцкай інфармацыі вайсковага характару, у прыватнасці, пра беларускую вайсковую інфраструктуру, пра перамяшчэнне войскаў і вайсковай тэхнікі, пра цяперашнюю сітуацыю на паўднёвым кірунку”.
У рэпартажы было сказана, што Наканісі Масатосі пераехаў у Гомель у 2018 годзе. З абласнога цэнтра ён нібыта ездзіў у раён беларуска-ўкраінскай мяжы, дзе “здымаў дарогі, масты, стратэгічныя аб’екты, кшталту вакзалаў ці аэрапортаў, інфраструктуру вайсковых аб’ектаў, а таксама чыгуначныя шляхі, напрыклад, там, дзе ляжаць вузкакалейныя рэйкі”.
Сцвярджалася, што падазраваны за шэсць гадоў жыцця ў Беларусі зрабіў больш за 9 тыс. “дакладных фатаграфій з беларуска-ўкраінскага прыгранічча”, якія ён “баяўся перадаваць праз інтэрнэт, а хацеў выключна асабіста, у рукі” аддаць “куратарам” пасля прыбыцця ў Японію.
Пра затрыманне ў Беларусі яшчэ аднаго японскага грамадзяніна за здымку аб’ектаў чыгуначнай інфраструктуры стала вядома летась 3 снежня.
Улады Японіі ў курсе сітуацыі, у якой апынуліся ў Беларусі Наканісі Масатосі і другі суайчыннік.
