Ад удзелу ў праверцы боегатоўнасці могуць быць вызваленыя сельгасрабочыя, занятыя ў пасяўной — ваенкам

12 сакавіка, Позірк. Падрабязнасці прызыву ваеннаабавязаных на праверку боегатоўнасці Узброеных сіл паведаміў 12 сакавіка начальнік мабілізацыйнага напрамку ваеннага камісарыята Мінска Ігар Дымовіч.

Паводле яго слоў, якія перадае прэс-служба Міністэрства абароны, ваеннаабавязаныя “прыбывалі па позве ў ваенны камісарыят, дзе ў іх удакладняліся ўліковыя даныя, абставіны, якія перашкаджаюць прызыву на ваенныя зборы”.

“У выпадку выяўлення такіх абставінаў згодна з заканадаўствам <…> прымалася рашэнне аб вызваленні ваеннаабавязаных ад праходжання ваенных збораў, і яны мяняліся альбо рэзервовымі, альбо ваеннаабавязанымі са складу рэшткаў свабодных рэсурсаў”, — сказаў ваенкам.

Ён назваў шэраг прычын, па якіх ваеннаабавязаныя не прызываюцца на ваенныя зборы: “Гэта сямейныя абставіны, у прыватнасці, трое дзяцей да 18 гадоў. Могуць быць вызваленыя ад збораў службовыя асобы, якія забяспечваюць палёты авіяцыі, рух чыгуначнага транспарту, выкладчыцкі склад і тыя, хто заняты на сельскагаспадарчых работах менавіта ў перыяд пасяўной. Ёсць таксама шэраг іншых абставінаў па рашэнні ваеннага камісара”.

Праверка боегатоўнасці арміі праводзіцца ў Беларусі з 3 лютага. Яе мэтай, як раней адзначала Мінабароны, з’яўляецца праверка здольнасці камандзіраў кіраваць сваімі падраздзяленнямі пры вядзенні абарончага бою.

Для асабістага складу асноўная задача — атрыманне практыкі і ўдасканаленне навыкаў у ходзе правядзення адзіночнай падрыхтоўкі і баявога зладжвання ў складзе падраздзяленняў.

У рамках праверкі боегатоўнасці Узброеных сіл з запасу на зборы выклікана каля 5 тыс. ваеннаабавязаных, паведаміў 5 сакавіка начальнік Генеральнага штаба УС — першы намеснік міністра абароны Павел Муравейка.

Рэжым Аляксандра Лукашэнкі безупынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.

У лютым 2022 года ўварванне ажыццёўлена ў тым ліку з беларускай тэрыторыі.