МНС папярэджвае пра ўзмацненне ветру і пахаладанне

14 сакавіка, Позірк. Паўднёвы вецер з пераходам на заходні і паўночна-заходні хуткасцю 5–10 метраў на секунду і парывамі да 14 м/с чакаецца 14 сакавіка ў Беларусі. Разам з тым узмацненне заходняга ветру парывамі 15–20 м/с прагназуецца раніцай у многіх раёнах, а ўдзень — ва ўсходняй частцы краіны, папярэджвае Міністэрства па надзвычайных сітуацыях.

“Удзень чакаецца рэзкая змена ўмоў надвор’я. Пахаладае”, — паведамляе ведамства.

Такія ўмовы надвор’я, гаворыцца ў паведамленні, небяспечныя тым, што могуць прывесці да “пашкоджання (абрыву) ліній сувязі і электраперадачы; адключэння электрычных падстанцый, электраэнергіі ў населеных пунктах; пашкоджання (абвальванню) слаба ўмацаваных канструкцый, дахаў будынкаў, збудаванняў; падзення дрэў”.

Паводле інфармацыі МНС і Белгідрамета, раніцай на большай частцы Беларусі, а ўдзень — пераважна на поўначы будуць ападкі, у прыватнасці “дождж, які будзе пераходзіць у мокры снег”.

Тэмпература паветра на працягу сутак — ад 1 градуса цяпла на паўночным захадзе да 11 градусаў цяпла на поўдні.

Шкала Бофарта класіфікуе вецер хуткасцю 8–10 і 11–13 м/c як свежы і моцны адпаведна (5 і 6 балаў з 12), 14–17, 18–20 м/с — моцны і вельмі моцны (7 і 8 балаў).