Ціханоўская ў нацыянальнае свята падзякавала Ірландыі за падтрымку, Лукашэнка дату праігнараваў

17 сакавіка, Позірк. У віншаванні Ірландыі з нацыянальным святам (Дзень св. Патрыка, 17 сакавіка) дэмакратычны лідар Святлана Ціханоўская ў падзякавала краіне за падтрымку беларусаў “у барацьбе за свабоду”.

“Самыя цёплыя пажаданні жыхарам цудоўнай Ірландыі ў Дзень святога Патрыка!” — напісала палітык на сваёй старонцы ў сацыяльнай сетцы Х.

Ціханоўская адзначыла, што ў яе з дзяцінства захоўваюцца прыемныя ўспаміны аб краіне.

Апошнім разам дэмлідар наведвала Ірландыю ў траўні 2023 года, калі ёй была ўручана прэстыжная прэмія свету Тыперэры. У рамках візіту яна сустрэлася з прэзідэнтам краіны Майклам Хігінсам, прэм’ер-міністрам, міністрам замежных спраў, спікерамі дзвюх палат парламента, мэрам Дубліна, прэжстаўнікамі беларускай дыяспары.

У падлеткавым узросце Ціханоўская наведвала гэтую краіну ў рамках праекта “Мост жыцця для Чарнобыля”, жыла ў мясцовай сям’і.

Сёлета Аляксандр Лукашэнка праігнараваў нацыянальнае свята Ірландыі, хаця раней рэгулярна віншаваў яе народ. Апошняе віншаванне прэзідэнту краіны ад яго імя было накіраванае ў 2021 годзе.

У 2023-м “агульнымі каштоўнасцямі” двух народаў Лукашэнка называў “любоў да роднай зямлі, імкненне жыць у свеце і добрасуседстве, шчырай прыхільнасці да стваральнай працы”. Праз год у віншаванні ён падкрэсліў, што “хрысціянскія каштоўнасці аб’ядноўваюць беларусаў і ірландцаў, з’яўляюцца залогам устойлівага развіцця грамадства, даюць нам надзею і сілы ў складаны час”.

Афіцыйны Дублін займае прынцыповую крытычную пазіцыю ў адносінах да кіруючага ў Беларусі рэжыму і па сітуацыі з правамі чалавека і прытрымліваецца дзёсткай пазіцыі ў рамках санкцыйнай палітыкі ЕС.

Ірландыя ўнесена беларускім урадам у спіс “недружалюбных” дзяржаў.

Дыпламатычныя адносіны паміж краінамі ўстаноўлены 27 сакавіка 1992 года.

Асобнай амбасады Беларусі ў краіне няма, па сумяшчальніцтве Мінск прадстаўляе амбасадар у Вялікабрытаніі. Да 2022 года гэтую пасаду займаў Максім Ермаловіч. Пасля — прызначэння ў дыпмісію не было.

У якасці часовага паверанага ў справах краіны ў Вялікабрытаніі ў лютым гэтага года на сайце дыпмісіі згаданы Дзмітрый Казлоўскі.

Паводле звестак МЗС Беларусі, у 2021 годзе тавараабарот з Ірландыяй склаў 197,5 млн долараў (рост за год больш чым у тры разы), у тым ліку экспарт — 144,2 млн (835,4%), імпарт — 53,3 (+118,90). Пазнейшыя даныя не прыводзяцца.