У парламенце Вялікабрытаніі створана група “За дэмакратычную Беларусь”

20 сакавіка, Позірк. У парламенце Вялікабрытаніі 20 сакавіка створана ўсепартыйная група “За дэмакратычную Беларусь”, паведаміў “Позірку” галоўны дарадца Святланы Ціханоўскай Франак Вячорка.

Паводле яго слоў, група стане “дадатковай пляцоўкай для ўзмацнення падтрымкі беларускага руху з боку Вялікабрытаніі”.

Групу ўзначаліла член Кансерватыўнай партыі, “ценявы” міністр замежных спраў Вялікабрытаніі Уэндзі Мортан. У папярэднім складзе брытанскага парламента аналагічную групу ўзначальваў лейбарыст Тоні Лойд (памёр у студзені 2024 года, парламенцкія выбары прайшлі ў ліпені таго ж года).

4 сакавіка дарадца Ціханоўскай па канстытуцыйнай рэформе і парламенцкім супрацоўніцтве Анатоль Лябедзька паведаміў “Позірку”, што ў міжпарламенцкі альянс “За дэмакратычную Беларусь” уваходзяць 23–24 парламенцкія групы, гэтая колькасць змяняецца ў залежнасці ад выбараў у заканадаўчыя органы ў краінах, якія ўваходзяць у альянс, пасля чаго фарміраванне груп праходзіць “з нуля”.

Аб стварэнні альянсу “За дэмакратычную Беларусь” аднайменнымі групамі ў парламентах шэрагу дэмакратычных краін было абвешчана ў сакавіку 2023 года. Першая сустрэча прадстаўнікоў альянсу адбылася ў лістападзе таго ж года ў Берліне, другая — 6–7 сакавіка гэтага года ў Рыме.