Дзяржпагранкамітэт зноў абвінаваціў “літоўскіх сілавікоў” у збіцці мігранта
21 сакавіка, Позірк. Мужчына без дакументаў і асабістых рэчаў знойдзены 21 сакавіка “ў непасрэднай блізкасці ад беларуска-літоўскай мяжы”, паведамляе прэс-служба Дзяржаўнага пагранічнага камітэта.
Чалавек назваўся грамадзянінам Гамбіі і, як сцвярджае ведамства, заявіў, што “літоўскія сілавікі жорстка збілі яго і сілай вытурылі на беларускую тэрыторыю”.
Паведамляецца, што “першасны медагляд выявіў не толькі шматлікія цялесныя пашкоджанні, але і закрытую чэрапна-мазгавую траўму”. Мужчыну шпіталізавалі ў адну з бальніц Гродна.
Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты апынаюцца на мяжы з краінамі ЕС у зоне адказнасці пагранічнага ведамства.
Міграцыйны крызіс на мяжы Беларусі і краін Еўрасаюза цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Ад пачатку 2025 года суседнія дзяржавы ЕС спынілі сама меней 2,4 тыс. спробаў нелегальнага пранікнення з беларускай тэрыторыі, сведчыць праведзены “Позіркам” параўнальны аналіз аператыўных звестак іх памежных службаў. Літва зафіксавала 155 такіх спробаў.
За 2024 год Літва, Латвія і Польшча прадухілілі 36,3 тыс. спробаў незаконнага пранікнення мігрантаў з беларускай тэрыторыі.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца у Еўрасаюз праз Беларусь, таму што іх туды “паклікалі”.
