У спіс “экстрэмістаў” дадалі яшчэ 15 чалавек

Ілюстрацыйнае фота: Ron Dyar / unsplash.com

28 сакавіка, Позірк. У спіс “асоб, якія маюць дачыненне да экстрэмісцкай дзейнасці”, 28 сакавіка дадалі яшчэ 15 чалавек. Цяпер у дакуменце, размешчаным на сайце Міністэрства ўнутраных спраў, 5.088 пазіцый.

Усе ўнесеныя ў спіс грамадзяне асуджаныя паводле артыкулаў, якія ўлады выкарыстоўваюць для палітычнага пераследу.

“Экстрэмістамі” прызнаны Дзмітрый Цюкаеў, Стэфанія Філіпоўская, Ягор Косараў, Сяргей Бохан, Наталля Казлова, Раман Прыходзька, Тамара Патоцкая і Міхаіл Дычко. Насупраць іх прозвішчаў стаіць пазнака “судзімасць не пагашаная”, што звычайна азначае вынясенне выраку, не звязанага з пазбаўленнем волі. Пры гэтым Патоцкую праваабаронцы прызналі палітзняволенай. Згодна з іх інфармацыяй, 5 сакавіка ў судзе Першамайскага раёна Мінска жанчыну павінны былі пачаць судзіць паводле ч. 1 арт. 342 Крымінальнага кодэкса.

Аналагічны статус атрымалі асуджаныя на невядомыя тэрміны Алег Цішаль (арт. 368), Канстанцін Панамароў (ч. 1 арт. 342), Вольга Губар (ч. 1 арт. 130, ч. 3 арт. 361 і ч. 1 арт. 367),

Ігар Сімашковіч (ч. 3 арт. 130, ч. 1 арт. 343, ч. 3 арт. 361¹, ч. 1 арт. 368, арт. 369), Аляксандр Шэлепень (ч. 1 арт. 342).

У пералік таксама дадалі прозвішчы палітвязняў, асуджаных на невядомыя тэрміны пазбаўлення волі. Гэта ўдзельнік праграмы “Кадравы рэзерв для Новай Беларусі” Аляксандр Кукса (ч. 1 арт. 361³ і ч. 1 арт. 342) і затрыманы пасля вяртання ў Беларусь Руслан Зубкоў (арт. 368 і арт. 361⁴).

Даведка “Позірку”:

арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх;
арт. 343 — выраб і распаўсюд парнаграфічных матэрыялаў або прадметаў парнаграфічнага характару;
арт. 361 — заклікі да мер абмежавальнага характару (санкцый), іншых дзеянняў, скіраваных на прычыненне шкоды нацыянальнай бяспецы Рэспублікі Беларусь;
арт. 361¹ — стварэнне экстрэмісцкага фарміравання або ўдзел у ім;
арт. 361³ — удзел або падрыхтоўка да ўдзелу грамадзяніна Беларусі на тэрыторыі замежнай дзяржавы ў ваенных дзеяннях без упаўнаважвання дзяржавы;
арт. 361⁴ — садзейнічанне экстрэмісцкай дзейнасці;
арт. 367 — паклёп у дачыненні да прэзідэнта;
арт. 368 — абраза прэзідэнта;
арт. 369 — абраза прадстаўніка ўлады.