Ціханоўская выказала спачуванні сем’ям загінулых ад землятрусу ў М’янме і Тайландзе

28 сакавіка, Позірк. Спачуванні ў сувязі з землятрусам у М’янме і Тайландзе выказала на сваёй старонцы ў сацсетцы “Х” дэмакратычны лідар Святлана Ціханоўская.

“Разбуральны землятрус у М’янме і Тайландзе прывёў да вялізных пакут, і сапраўдная колькасць ахвяр толькі пачынае павялічвацца”, — адзначыла палітык.

Яна выказала “шчырае спачуванне” ахвярам землятрусу, іх сем’ям і “адважным супрацоўнікам службаў экстраннага рэагавання, якія рызыкуюць сваім жыццём, каб дапамагчы іншым”.

Землятрус магнітудай 7,7 адбыўся ў М’янме 28 сакавіка. Эпіцэнтр знаходзіўся за 16 кіламетраў ад горада Сагайн (насельніцтва складае 300 тыс. жыхароў), недалёка ад горада Мандалай (больш за 1,7 млн). Паведамлялася аб не менш як 144 загінулых і 732 траўмаваных.

Падземныя штуршкі адчуваліся ў суседніх краінах, у тым ліку ў Тайландзе. У сталіцы краіны Бангкоку абрынулася некалькі вышынных будынкаў. Загінула не менш як тры чалавекі, дзясяткі апынуліся пад заваламі.

З візітам у М’янме з 27 сакавіка знаходзіцца беларуская ваенная дэлегацыя на чале з міністрам абароны Віктарам Хрэніным.

2 лютага 2021 года ў М’янме пад кіраўніцтвам галоўнакамандуючага ўзброенымі сіламі старэйшага генерала Мін Аун Хлайна быў здзейснены ваенны пераварот, які выклікаў масавыя пратэсты, што перараслі ў грамадзянскую вайну.

Па ацэнках арганізацыі ACLED (Аrmed Conflict Location & Event Data) на 24 чэрвеня 2022 года, у выніку гвалту пасля перавароту агулам было забіта каля 21 тыс. чалавек.