Суд у Польшчы павялічыў тэрмін пакарання асуджанаму за шпіянаж беларусу, вызначыўшы яго штатным супрацоўнікам спецслужбаў
28 сакавіка, Позірк. Апеляцыйны суд у Познані (Польшча) вынес канчатковае рашэнне па справе аб шпіянажы, узмацніўшы пакаранне грамадзяніну Беларусі Андрэю Р., паведамляе партал tvn24.pl.
Тэрмін зняволення беларусу павялічаны з трох да чатырох гадоў.
Прыгавор у дачыненні да другога фігуранта справы — беларуса Дзмітрыя Н. — адменены, адзначае медыя. Раней суд першай інстанцыі яго апраўдаў, цяпер гэтае рашэнне накіравана на перагляд.
Судовы працэс у Познані праходзіў у закрытым рэжыме.
Суддзя Яраслаў Ахоцкі падкрэсліў, што адвакат Андрэя Р. у апеляцыі адзначыў неабгрунтаванасць абвінавачання ў прыхоўванні яго кліентам свайго вайсковага мінулага. Аднак, паводле меркавання суда, дзейнасць падраздзялення, у якім служыў мужчына, “накіравана на атрыманне інфармацыі, карыснай для беларускіх службаў”.
Суд прыйшоў да высновы, што асуджаны быў штатным супрацоўнікам беларускіх спецслужбаў.
“Бясспрэчным фактам”, даказаным падчас працэсу, Ахоцкі назваў тое, што пасля затрымання беларуса ў гатэль, дзе ён жыў, паступіла шмат тэлефонных званкоў ад невядомай жанчыны, якая хацела даведацца, што з ім здарылася. Пры гэтым нумары тэлефонаў, з якіх яна званіла, “ўказвалі на розныя краіны”, а значыць, жанчына выкарыстоўвала тэхналогіі для маскіроўкі свайго месцазнаходжання. Суд прыйшоў да высновы, што гэтыя абставіны сведчаць пра “інстытуцыялізаваную форму дзеянняў”, якая “недаступная звычайнаму чалавеку”.
29 красавіка 2024 года суд Познані прызнаў 51-гадовага грамадзяніна Беларусі, вайскоўца ў адстаўцы Андрэя Р., вінаватым у шпіянажы на карысць Мінска і прызначыў яму тры гады пазбаўлення волі.
Пракуратура патрабавала прызначыць пяць гадоў зняволення.
Суд адзначыў, што доказаў віны асуджанага няшмат, але гэта сведчыць “пра высокі прафесіяналізм абвінавачанага і ўменне пазбягаць выкрыцця”.
Суд улічыў кароткі тэрмін збору звестак пра ваенныя аб’екты ў Польшчы, а таксама адсутнасць доказаў таго, што фігурант паспеў іх камусьці перадаць.
Другі фігурант справы — 57-гадовы музыка і кіроўца Дзмітрый Н. — быў апраўданы праз адсутнасць доказаў. Гэты мужчына да рашэння суда быў вызвалены з-пад варты з умовай не пакідаць Польшчу. Суддзя адмяніла ў дачыненні да яго паліцэйскі нагляд і абмежаванне на выезд.
Судовы разгляд цягнуўся з 19 кастрычніка 2023 года ў закрытым рэжыме.
Следства меркавала, што мужчыны прыехалі ў Польшчу працаваць кіроўцамі, аднак іх асноўнай мэтай было назіранне за вайсковымі і грамадзянскімі аб’ектамі, якія маюць крытычна важнае значэнне для абараназдольнасці краіны. Паводле версіі абвінавачання, яны збіралі інфармацыю менш за месяц — з 6 сакавіка па 4 красавіка 2022 года.
Згодна з абвінавачваннем, такім чынам фігуранты прымалі ўдзел “у дзейнасці службы знешняй разведкі Галоўнага разведвальнага ўпраўлення Генеральнага штаба Узброеных сіл Рэспублікі Беларусь, накіраванай супраць Рэспублікі Польшча”.
