Ануляванае пасведчанне аб дзяржрэгістрацыі “Першага музычнага канала”

2 верасня, Позірк. Міністэрства інфармацыі паведаміла аб ануляванні дзяржаўнай рэгістрацыі “тэлепраграмы “Першы музычны канал”.

Пасведчанне ануляванае на падставе звароту ТАА “Музычны канал”, загадам Мінінфарма ад 2 верасня № 322 канал выключаны з Дзяржаўнага рэестра сродкаў масавай інфармацыі.

“Звяртаем увагу распаўсюджвальнікаў прадукцыі тэлевізійных і радыёвяшчальных сродкаў масавай інфармацыі на неабходнасць выключэння тэлепраграмы “Першы музычны канал” з пераліку тэлепраграм, якія яны распаўсюджваюць”, — гаворыцца ў паведамленні.

13 траўня Мінінфарм вынесла пісьмовае папярэджанне заснавальніку беларускай “тэлепраграмы “Першы музычны канал”.

Ведамства адзначыла, што падставай для прыняцця рашэння стала невыкананне заснавальнікам патрабаванняў, устаноўленых заканадаўствам аб СМІ. Якіх-небудзь падрабязнасцяў, уключаючы прычыну вынясення папярэджання, ведамства не прыводзіла.

“Першы музычны канал” пачаў вяшчанне пад гэтай назвай 1 сакавіка 2002 года.

19 лютага 2004 года канал упершыню ў гісторыі беларускага тэлебачання перайшоў на стопрацэнтнае інтэрактыўнае вяшчанне.

У студзені 2010 года праведзены рэбрэндынг, у выніку чаго канал змяніў назву на ВТБ.