2 верасня, Позірк. У жніўні суседнія краіны Еўрасаюза прадухілілі мінімум 6.685 спробаў мігрантаў незаконна перасекчы мяжу з боку Беларусі — толькі на 2,1% менш, чым было ў рэкордным для 2025 года траўні (6.825), сведчыць праведзены “Позіркам” аналіз штодзённых даных еўрапейскіх памежных службаў.
За студзень — жнівень 2025-га суседнія краіны ЕС прадухілілі сама меней 34.045 спробаў незаконнага перасячэння мяжы з боку Беларусі — на 20% больш, чым за восем месяцаў мінулага года (28.376).
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды “паклікалі”.
