Прадстаўнікі АПК заклікалі ўлады Украіны дапамагчы ў вызваленні беларускіх палітвязняў
3 красавіка, Позірк. З заклікам дапамагчы ў вызваленні беларускіх палітвязняў да ўладаў Украіны звярнуліся прадстаўнікі Аб’яднанага пераходнага кабінета (АПК) Вольга Зазулінская (па сацыяльнай палітыцы) і Вадзім Кабанчук (па абароне і нацыянальнай бяспецы).
Адпаведныя лісты накіраваныя прэзідэнту Украіны Уладзіміру Зяленскаму, упаўнаважанаму Вярхоўнай Рады па правах чалавека Дзмітрыю Лубінцу, а таксама ў Міністэрства замежных спраў, паведамляе прэс-служба АПК.
Прадстаўнікі структуры дэмакратычных сіл адзначылі, што “пасля пачатку расійскай агрэсіі супраць Украіны шмат грамадзян Беларусі выступілі з адкрытай падтрымкай украінскага боку — удзельнічалі ў пратэстах, інфармацыйных і валанцёрскіх ініцыятывах, а таксама далучаліся да добраахвотніцкіх падраздзяленняў”. Яны канстатавалі, што рэжым Аляксандра Лукашэнкі — саюзнік Крамля — “жорстка пераследуе любыя праявы салідарнасці з Украінай”, у выніку чаго “шмат беларусаў было арыштавана і асуджана на працяглыя тэрміны паводле сфабрыкаваных абвінавачванняў”.
Зазулінская і Кабанчук прапанавалі Украіне ў пытанні вызвалення палітвязняў “скарыстаць даступныя дыпламатычныя і міжнародныя механізмы”. Кіеў, на іх думку, мог бы “ініцыяваць кансультацыі з міжнароднымі партнёрамі адносна ўключэння беларускіх палітвязняў у абменныя спісы, публічна выказаць падтрымку гэтым асобам і запатрабаваць іх вызвалення, прыцягнуць міжнародныя арганізацыі (ААН, АБСЕ, Чырвоны Крыж) да перамоўнага працэсу, узмацніць ціск на Расію як саюзніка Лукашэнкі”.
Украіна, лічаць прадстаўнікі АПК, таксама магла б “разглядаць беларускіх палітвязняў як ахвяр палітычных рэпрэсій за іх праўкраінскую пазіцыю”.
“Заклікаем Украіну разгледзець гэтыя прапановы і выкарыстаць усе магчымыя механізмы для садзейнічання вызваленню беларускіх палітвязняў, якія падтрымліваюць Украіну”, — адзначылі Зазулінская і Кабанчук. На іх думку, такі крок не толькі падкрэсліў бы “імідж Украіны як дзяржавы, што абараняе правы чалавека і падтрымлівае дэмакратычныя рухі”, але таксама ўмацаваў бы сувязі з беларускай грамадзянскай супольнасцю, прадэманстраваў салідарнасць і аслабіў пазіцыі рэжыму Лукашэнкі.
Да лістоў прадстаўнікі АПК далучылі “спіс беларускіх палітзняволеных, якія падтрымалі Украіну”.
24 лютага 2025 года праваабарончы цэнтр “Вясна” апублікаваў статыстычныя даныя, згодна з якімі за тры гады поўнамаштабнай вайны РФ супраць Украіны ў Беларусі за ахвяраванні беларускім добраахвотнікам асудзілі сама меней 41 чалавека, за намер ваяваць на баку Украіны — мінімум 30, за перадачу медыя фотаздымкаў і відэазапісаў расійскай вайсковай тэхнікі — не менш як 93.
“Агулам у Беларусі па крымінальных справах за падтрымку Украіны асудзілі як мінімум 209 чалавек, сярод якіх 38 жанчын”, — паведамлялі праваабаронцы.
Апрача таго, як было адзначана, ад пачатку вайны ўкраінцы трапляюць пад пераслед у Беларусі. “Пры ўездзе ў нашую краіну іх пільна даглядаюць і дапытваюць спецслужбы, а некаторых не ўпускаюць без тлумачэння прычынаў. Некаторыя ўкраінцы зазнаюць крымінальны пераслед за “агентурную дзейнасць”, “спробы дыверсій” і “шпіянаж”. На сёння ў Беларусі асудзілі як мінімум 13 грамадзянаў Украіны”, — звяртала ўвагу “Вясна”.
На 3 красавіка беларуская праваабарончая супольнасць прызнае палітвязнямі 1.208 чалавек, аднак насамрэч людзей, якія зазналі рэпрэсіі ў той ці іншай форме, значна больш.
Афіцыйны Мінск падтрымлівае Маскву ў развязанай ёю вайне супраць Украіны. У дачыненні да Беларусі ўведзена некалькі пакетаў еўрапейскіх санкцый як праз падтрымку расійскай агрэсіі, так і ў сувязі з парушэннем правоў чалавека ў краіне.