Пошліны ЗША закранулі амаль 180 краін свету, у тым ліку постсавецкія — за выключэннем Беларусі і РФ

3 красавіка, Позірк. Уведзеныя прэзідэнтам Злучаных Штатаў Амерыкі Дональдам Трампам пошліны на імпарт закранулі амаль 180 краін свету. У іх ліку практычна ўсе дзяржавы былога СССР — за выключэннем Беларусі і Расіі, сведчыць пералік, апублікаваны 2 красавіка Белым домам.

У адпаведнай табліцы пазначаныя памеры пошлін, якія Вашынгтон будзе прымяняць да тавараў з краін у адказ на іх “пошліны, што спаганяюцца з ЗША, уключаючы маніпуляцыі з валютай і гандлёвыя бар’еры” (далей пазначаныя ў дужках).

Для Арменіі, Азербайджана, Грузіі, Кыргызстана, Таджыкістана, Туркменістана, Украіны і Узбекістана яны роўныя 10% (10%), Казахстана — 27% (54%), Малдовы — 31% (61%). На Латвію, Літву і Эстонію распаўсюджваюцца вызначаныя для Еўрасаюза пошліны — 20% (39%).

Прэс-сакратар Белага дома Кэралайн Левіт заявіла медыя Axios, што Расія не фігуруе ў гэтым спісе, бо санкцыі ЗША ўжо “выключаюць магчымасць значнага гандлю”, а “Куба, Беларусь і Паўночная Карэя — <…> паколькі існыя тарыфы і санкцыі супраць іх ужо высокія”.

Указ Трампа пра пошліны названы “дэкларацыяй эканамічнай незалежнасці”. Іх увядзенне аргументаванае тым, што многія краіны — “як сябры, так і ворагі”, — доўгія гады нібыта “рабавалі” ЗША.

8 красавіка 2022 года папярэдні прэзідэнт ЗША Джо Байдэн падпісаў закон аб “прыпыненні нармальных гандлёвых стасункаў з Расіяй і Беларуссю” (свабоднага гандлю).