З Расіі ў Беларусь спрабавалі незаконна завезці ядахімікаты

3 красавіка, Позірк. Партыю соляў іртуці знайшлі ў грузавіку, які рухаўся з Расіі, супрацоўнікі Гомельскай (адказвае за рэгіён) і Аператыўнай (з юрысдыкцыяй па ўсёй краіне) мытні “пры правядзенні спецмерапрыемства”, паведаміла 3 красавіка прэс-служба Дзяржаўнага мытнага камітэта.

Паводле інфармацыі ведамства, транспарт спынілі на дарозе М-10 (мяжа РФ (Селішча) — Гомель — Кобрын) у Добрушскім раёне Гомельскай вобласці. Кіроўца “заявіў, што перамяшчае рознае абсталяванне, у пацвярджэнне перадаў суправаджальныя дакументы”.

Пры надглядзе высветлілася, што “акрамя заяўленых тавараў у грузавым адсеку знаходзіцца кардонная каробка з 35 кг розных хімічных рэчываў”. “Хімікаты вынялі і накіравалі на экспертызу ў Дзяржаўны камітэт судовых экспертыз, дзе і было высветлена, што 4,5 кг з іх — гэта водарастваральныя солі ртуці”, — адзначылі мытнікі.

Па выніках праверкі “на падставе прыкмет здзяйснення злачынства” паводле арт. 333¹ КК (незаконнае перамяшчэнне праз дзяржмяжу Беларусі атрутных рэчываў) матэрыялы накіраваныя ва ўпраўленне Следчага камітэта па Гомельскай вобласці.

Даведка “Позірку”:

У адпаведнасці з згаданым крымінальным артыкулам незаконнае перамяшчэнне праз мытную мяжу ЕАЭС або дзяржмяжу Беларусі “моцнадзейных, ядавітых, атрутных рэчываў, радыеактыўных матэрыялаў, агнястрэльнай зброі, яе складовых частак або кампанентаў, боепрыпасаў, выбуховых рэчываў, выбухных прылад, зброі масавага паражэння, таксама іншых відаў узбраення і вайсковай тэхнікі” караецца пазбаўленнем волі на тэрмін ад 3 да 7 гадоў са штрафам ці без.