Ціханоўская анансавала пасяджэнне ў Варшаве міжведамаснай групы па спрашчэнні легалізацыі беларусаў у Польшчы
4 красавіка, Позірк. У траўні пройдзе першае пасяджэнне міжведамаснай рабочай групы па спрашчэнні легалізацыі грамадзян Беларусі ў Польшчы, паведамляе прэс-служба дэмакратычнага лідара Святланы Ціханоўскай.
Пасяджэнне адбудзецца ў Варшаве, адзначаецца, што будуць разгледжаныя пытанні віз, відаў на жыхарства і міжнароднай абароны.
Дамоўленасць пра правядзенне мерапрыемства была дасягнута падчас сустрэчы дарадцаў дэмлідара Дзяніса Кучынскага і Анатоля Лябедзькі з намесніцай дырэктара Усходняга дэпартамента МЗС Польшчы Ганнай Костшэвай-Міштал і ўпаўнаважаным прадстаўніком знешнепалітычнага ведамства па супрацоўніцтве з беларускімі дэмакратычнымі сіламі Адамам Галаціньскім.
Кучынскі і Лябедзька, як паведамляецца, сустрэліся ў Варшаве таксама з кіраўніком кабінета прэм’ер-міністра Польшчы Дональда Туска Паўлам Грасем. З ім былі абмеркаваныя “пытанні рэгіянальнай бяспекі і правядзення сумесных мерапрыемстваў падчас бягучага старшынства Польшчы ў ЕС”.
З дырэктарам Бюро міжнароднай палітыкі прэзідэнта Польшчы Марцінам Лапчыньскім абмяркоўваўся ўдзел Ціханоўскай у 10-м Саміце трох мораў, які адбудзецца ў Варшаве 28–29 красавіка 2025 года.
Пытанні “прыняцця рэзалюцыі аб непрызнанні прэзідэнцкіх выбараў у Беларусі, падпісання пагаднення аб супрацоўніцтве дэмакратычных сіл і польскага парламента, паляпшэння прававога рэгулявання для беларускай дыяспары”, а таксама “прававой экспертызы Канстытуцыі новай Беларусі” былі разгледжаны на сустрэчы з дэпутатамі Сейма Аляксандрай Узнаньскай-Вісьнеўскай, Рышардам Петру і Робертам Тышкевічам.
З амбасадарамі Францыі, Вялікабрытаніі і Германіі пры АБСЕ дарадцы Ціханоўскай, сярод іншага, “абмеркавалі пытанні далейшага супрацоўніцтва”, гаворыцца ў паведамленні.
Магчымасць стварэння ў Польшчы міжведамаснай працоўнай групы для вырашэння праблем беларусаў, якія знаходзяцца ў краіне, абмяркоўвалася 4 кастрычніка мінулага года на сустрэчы Ціханоўскай з міністрам унутраных спраў і адміністрацыі Польшчы Тамашам Семанякам. Хто ўвойдзе ў склад групы, не паведамлялася.