Мінэнерга справаздачылася аб аднаўленні электразабеспячэння ва ўсіх населеных пунктах, пацярпелых ад непагадзі

8 красавіка, Позірк. Аб аднаўленні электразабеспячэння ва ўсіх населеных пунктах, пацярпелых ад непагадзі, паведаміла Міністэрства энергетыкі.

“На 23:00 7 красавіка, дзякуючы зладжаным і дакладным дзеянням энергетыкаў, усе населеныя пункты рэспублікі забяспечаныя электраэнергіяй”, — адзначыла ведамства.

“Цягам апошніх двух дзён энэргетыкі, працуючы ў складаных умовах надвор’я, бесперапынна ліквідавалі наступствы ўрагану “Зіён”, — гаворыцца ў паведамленні.

Паводле ўдакладненых звестак, усяго праз непагадзь электразабеспячэнне парушалася ў больш чым 840 населеных пунктах Беларусі.

Напрыканцы мінулага тыдня ў Беларусі істотна пахаладала, быў абвешчаны аранжавы ўзровень небяспекі. Па краіне прайшлі дажджы і снегапады, быў моцны вецер. Па прагнозах Белгідрамета, халоднае надвор’е захаваецца ў бліжэйшыя дні.