Прызначаны новы начальнік Акадэміі МУС

8 красавіка, Позірк. Аляксандр Лукашэнка 8 красавіка прызначыў генерал-маёра міліцыі Аляксандра Астрэйку начальнікам Акадэміі Міністэрства ўнутраных спраў, вызваліўшы яго ад пасады начальніка ўпраўлення ўнутраных спраў Мінскага аблвыканкама.

Вызваленае месца ў УУС Мінскага аблвыканкама зойме цяперашні начальнік УУС Віцебскага аблвыканкама генерал-маёр міліцыі Андрэй Любімаў. На ягонае месца прызначаны палкоўнік міліцыі Максім Субота, паведамляе прэс-служба Лукашэнкі. Да прызначэння ён быў намеснікам начальніка УУС Брэсцкага аблвыканкама.

12 сакавіка Лукашэнка вызваліў ад пасады начальніка ВНУ генерал-маёра міліцыі Аляксандра Васільева. Той быў залічаны ў распараджэнне міністра ўнутраных спраў.

Ураджэнец Капыльшчыны (Мінская вобласць) Астрэйка ўзначальваў УУС Мінскага аблвыканкама з мая 2021 года. Раней працаваў у Капыльскім, Слуцкім, Салігорскім РАУС, УУС Мінскага і Брэсцкага аблвыканкамаў. Званне генерал-маёра міліцыі мае з чэрвеня 2018 года.

Акадэмія рыхтуе кадры для сістэмы МУС. У навучальнай установе дзейнічаюць факультэты крымінальнай міліцыі, міліцыі грамадскай бяспекі, следча-экспертны, крымінальна-выканаўчы факультэты, а таксама Інстытут псіхалогіі службовай дзейнасці Маскоўскага ўніверсітэта МУС імя Кікоця.

Таксама ў ВНУ ёсць аддзяленне завочнага навучання факультэта павышэння кваліфікацыі.

Паводле інфармацыі на сайце ўстановы, у 2025 годзе за кошт бюджэту ў акадэмію плануецца набраць каля 500 чалавек.

Усе курсанты забяспечваюцца бясплатным пражываннем і трохразовым харчаваннем. На першым і другім курсах пражыванне ў інтэрнаце з’яўляецца абавязковым.