За восем дзён беларускім бязвізам скарысталася 5,2 тыс. еўрапейцаў — Дзяржпагранкамітэт

15 красавіка, Позірк. З 7 да 15 красавіка Беларусь у бязвізавым парадку наведала 5.205 жыхароў еўрапейскіх дзяржаў, вынікае з інфармацыі Дзяржаўнага пагранічнага камітэта.

Ведамства апублікавала статыстычныя даныя 15 красавіка, прымеркаваўшы іх да трэцяй гадавіны ўвядзення бязвізавага рэжыму для жыхароў Латвіі і Літвы.

За папярэднія восем дзён у краіну накіравалася 1.629 грамадзян і неграмадзян Латвіі, 1.593 грамадзяніны Літвы, 649 грамадзян Польшчы і 1.334 грамадзяніны з ліку прадстаўнікоў іншых еўрапейскіх дзяржаў.

Агулам за тры гады дзеяння бязвіза, паводле даных Дзяржпагранкамітэта, Беларусь наведала 1.085.599 жыхароў Еўропы. З Латвіі прыбыло 341.553, Літвы — 610.896, Польшчы — 110.297.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “на падставе сапраўдных дакументаў”, знаходзіцца на беларускай тэрыторыі “не больш за 30 сутак з дня ўезду”.

13 снежня 2024 года бязвіз для жыхароў 38 еўрапейскіх краін падоўжаны да канца 2025-га.