На захадзе Беларусі чакаюцца навальніцы, МНС папярэджвае пра небяспеку
19 красавіка, Позірк. У заходняй частцы Беларусі чакаюцца кароткачасовыя дажджы, ранкам і ўдзень месцамі навальніцы, папярэджвае Міністэрства па надзвычайных сітуацыях.
Прагназуецца паўднёвы вецер хуткасцю 4–9 метраў на секунду (у дыяпазоне 3–5 балаў з 12 па шкале Бофарта; класіфікуецца ў парадку ўзрастання як слабы, умераны і свежы), ранкам і ўдзень — парывы да 14 м/c (7 з 12; моцны вецер).
На захадзе краіны тэмпература паветра складзе 19 градусаў цяпла, на ўсходзе — да 26 градусаў.
Гэтыя ўмовы надвор’я, папярэджвае МНС, могуць прывесці да пашкоджання (абрыву) ліній сувязі і электраперадачы, адключэння электрычных падстанцый, электраэнергіі ў населеных пунктах; а таксама пажараў у жылых і вытворчых будынках.
