Мінабароны да канца года хоча закупіць БПЛА на 3,3 млн долараў
27 красавіка, Позірк. Міністэрства абароны плануе да канца года закупіць беспілотныя лятальныя апараты (БПЛА) на суму 10,1 млн рублёў (каля 3,3 млн долараў), вынікае з інфармацыі, размешчанай на партале дзяржзакупак.
Ведамства разлічвае набыць 187 FPV-дронаў Caddx X10 (AI version), 190 FPV-дронаў Caddx X10 (IR version), 20 камплектаў з FPV-дронамі, 81 тактычны беспілотны авіяцыйны комплекс на базе мульцікоптэра DJI Mavic3 Thermal, 83 тактычныя беспілотныя авіяцыйныя комплексы на базе мульцікоптэра Autel EVO MAX 4T.
Пры адсутнасці заяўленых мадэляў Мінабароны гатова набыць іх аналагі.
“У большасці сваёй гэта беспілотнікі кітайскай вытворчасці”, — адзначае тэлеграм-канал “АдВінта | Авіяцыя Беларусі”.
Звяртаецца ўвага, што DJI Mavic3 Thermal і Autel EVO MAX 4T прызначаныя для паветранай выведкі. “А апошні да таго ж акрамя цеплавізійнай камеры абсталяваны лазерным далямерам. Грунтуючыся на тэхналогіі распазнання ШІ, ён здольны аўтаматычна ідэнтыфікаваць і захопліваць розныя тыпы цэляў, такіх як крыніцы цяпла, людзі ў руху або транспартныя сродкі”, — гаворыцца ў паведамленні канала.
“Варта адзначыць, што акрамя БПЛА кітайскай вытворчасці, МА РБ апошнія некалькі гадоў актыўна закупляла расійскія БАК (беспілотны авіяцыйны комплекс. — “Позірк“.) “Supercam” розных мадыфікацый, а таксама беларускія БАК “Беркут-3”, — адзначаецца ў публікацыі.
23 красавіка Аляксандр Лукашэнка падпісаў указ, які спрашчае парадак увозу ў Беларусь“грамадзянскіх беспілотных лятальных апаратаў і авіямадэляў у інтарэсах сілавых, праваахоўных і іншых арганізацый”. У дакуменце падкрэслена, што ён датычыцца паставак у тым ліку для Камітэта дзяржкантролю, Службы бяспекі прэзідэнта, Аператыўна-аналітычнага цэнтра, Камітэта дзяржбяспекі, Следчага камітэта, Міністэрства ўнутраных спраў, Міністэрства абароны, Міністэрства па надзвычайных сітуацый, Дзяржпагранкамітэта.
Акрамя таго, у мэтах “узмацнення кантролю” за абаротам БПЛА ўводзіцца абавязак юрыдычных асоб і індывідуальных прадпрымальнікаў узгадняць продаж гэтай тэхнікі да яе ажыццяўлення.
Папярэдняй рэдакцыяй указа юрыдычныя асобы і індывідуальныя прадпрымальнікі, якія валодаюць грамадзянскімі БПЛА, абавязаныя былі паставіць іх на дзяржаўны ўлік, фізічных асоб абавязалі ажыццявіць іх адчужэнне.
Першапачатковы ўказ абмяркоўваўся і прымаўся на фоне атакі БПЛА 26 лютага таго ж года ў Мачулішчах (Мінскі раён) дарагога расійскага вайсковага самалёта далёкага радыёлакацыйнага выяўлення А-50.
Стварэнне спецыялізаваных класаў падрыхтоўкі аператараў БПЛА на ваенных факультэтах і кафедрах усіх вышэйшых навучальных устаноў Беларусі анансаваў 30 снежня 2024 года начальнік упраўлення прымянення і развіцця беспілотных авіяцыйных комплексаў Узброеных сіл Міхаіл Бранскі.
Мінабароны рэгулярна паведамляе аб правядзенні вучэнняў з ужыванняў БПЛА. Так, 17 красавіка прэс-служба ведамства адзначала, што ў Гродне кіраўнікі раённых і гарадскіх выканаўчых камітэтаў сярод іншага знаёмяцца з метадамі прымянення дронаў і процідзеяння ім.