Лукашэнка запрасіў у госці новага пантыфіка

8 траўня, Позірк. Аляксандр Лукашэнка запрасіў у госці новага кіраўніка рымска-каталіцкай царквы Льва XIV.

“Буду вельмі рады бачыць вас на нашай гасціннай зямлі, дзе хрысціянства здаўна з’яўляецца важным элементам грамадскага жыцця і культуры беларусаў“, — гаворыцца ў віншаванні, якое Лукашэнка падпісаў вечарам 8 траўня ў Маскве, куды прыбыў для ўдзелу ў расійскім парадзе з нагоды 80-годдзя перамогі над нацысцкай Германіяй.

Аўтару паслання “прыемна адзначыць“, што “апошнім часам стасункі паміж Рэспублікай Беларусь і Святым Пасадам характарызуюцца пазітыўнай дынамікай, а наша бачанне шляхоў вырашэння надзённых праблем сучаснага свету супадае”.

“Перакананы, што хуткі прыезд амбасадара Беларусі ў Ватыкан і адкрыццё амбасады пры Святым Пасадзе нададуць новы імпульс нашаму супрацоўніцтву ў дусе даверу і ўзаемаразумення“, — гаворыцца ў пасланні.

Лукашэнка, які адкрыта падтрымлівае расійскую агрэсію супраць Украіны і пераследуе каталіцкіх святароў з палітычных матываў, пажадаў новаму пантыфіку “мужнасці і поспехаў ва ўмацаванні міру і развіцці міжрэлігійнага дыялогу“.

Нягледзячы на запрашэнні Лукашэнкі, яшчэ ніводзін папа не наведваў Беларусь.

Гл. таксама па тэме:

Ціханоўская і Латушка спадзяюцца, што новы папа Леў XIV стане голасам падтрымкі для тых, хто церпіць пераслед

За якую Беларусь маліўся Францішак? Пра спадчыну пантыфіка і яго найлепшага пераемніка