Працягнута адхіленне беларускіх баскетбольных каманд ад міжнародных турніраў
16 траўня, Позірк. Міжнародная федэрацыя баскетбола (ФІБА) працягнула адхіленне беларускіх зборных і клубаў ад спаборніцтваў пад сваёй эгідай, паведаміла прэс-служба арганізацыі.
Адхіленне працягнецца да наступнага пасяджэння выканаўчага камітэта ФІБА, якое запланавана на жнівень 2025 года.
Санкцыі супраць беларускага (і расійскага) баскетбола падаўжаліся некалькі разоў пасля ваеннага ўварвання РФ ва Украіну.
19 траўня 2023 года стала вядома, што беларускія і расійскія клубы не змогуць заявіцца для ўдзелу ў міжнародных турнірах пад эгідай еўрапейскага аддзялення ФІБА.
21 красавіка паведамлялася, што выканаўчы камітэт ФІБА-Еўропа аднагалосна прыняў рашэнне не дапускаць мужчынскія зборныя Беларусі і Расіі да кваліфікацыі Еўрабаскета-2025.
1 сакавіка 2022 года чатыры беларускія клубы — мужчынскія “Цмокі” (Мінск) і “Барысфен” (Магілёў), жаночыя “Гарызонт” (Мінск) і “Алімпія” (Гродна) — былі выключаныя са спаборніцтваў у еўрапейскіх клубных лігах.
18 траўня таго ж года выканаўчы камітэт ФІБА забараніў праводзіць свае спаборніцтвы на тэрыторыі Беларусі і РФ, а таксама выключыў каманды гэтых краін са сваіх турніраў. Беларускія зборныя адхілілі ад удзелу ў адборачных матчах мужчынскага ЧС-2023, жаночага ЧС-2022, ЧС сярод дзяўчат (U 17), а таксама мужчынскіх і жаночых турніраў у фармаце 3х3.
28 лютага 2022 года, праз чатыры дні пасля поўнамаштабнага ўварвання расійскай арміі ва Украіну, Міжнародны алімпійскі камітэт заклікаў міжнародныя спартыўныя федэрацыі не дапускаць да спаборніцтваў атлетаў з Расіі і Беларусі. Рэкамендацыя была неадкладна і масава прынята да выканання.
28 сакавіка 2023 года па выніках пасяджэння ў Лазане (Швейцарыя) МАК апублікаваў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. Шэраг федэрацый выканалі рэкамендацыю, дзякуючы гэтаму абмежаваная колькасць беларусаў удзельнічала ў летніх Алімпійскіх гульнях 2024 года.
Рэкамендацыя МАК не распаўсюджваецца на камандныя віды спорту, бо “каманды атлетаў з расійскімі або беларускімі пашпартамі не разглядаюцца”.