На выходных у Беларусі патанулі два чалавекі

18 траўня, Позірк. На выходных у Беларусі патанулі два чалавекі, вынікае з паведамленняў афіцыйных інстанцый.

Аб выяўленні 17 траўня патанулай жанчыны 1961 года нараджэння гаворыцца ў аператыўнай зводцы Міністэрства па надзвычайных сітуацыях. Адзначаецца, што яна загінула ў возеры Альхоўцы каля аднайменнай вёскі Ляхавіцкага раёна (Брэсцкая вобласць).

Таварыства ратавання на водах (ТРВОД) паведаміла пра гібель у ноч на 17 траўня мужчыны 1963 г.н. на тэрыторыі штучнага вадаёма ў Светлагорскім раёне (Гомельская вобласць). Загінулы быў знойдзены мінаком, прызначаная судова-медыцынская экспертыза, гаворыцца ў паведамленні.

32-гадовы жыхар Лельчыцкага раёна (Гомельская вобласць) памёр у салоне аўтамабіля, які “самаадвольна з’ехаў” у раку Прыпяць, паведаміла 12 траўня прэс-служба Следчага камітэта.

Паводле інфармацыі ведамства, мужчына разам з 38-гадовым жыхаром таго ж раёна паехаў на рыбалку ў Мазырскі раён (Гомельская вобласць). Рыбакі размясціліся на правым беразе Прыпяці ля вёскі Шастовічы.

“Папярэдне высветлена, што падчас рыбалкі мужчыны ўжывалі спіртное. На начлег размясціліся ў аўтамабілі. “Ніва”, што стаяла пад ухілам, самаадвольна з’ехала ў раку. У старэйшага мужчыны атрымалася выбрацца з салона і выратавацца. Малодшы патануў. Той рыбак, што выжыў, дабег да бліжэйшай вёскі і выклікаў ратавальнікаў”, — паведаміў СК.

12 траўня Міністэрства па надзвычайных сітуацыях паведаміла, што “11 траўня ў 15:46 паступіла паведамленне пра выяўленне патанулага мужчыны ў рацэ Свіслач у г. Мінску па вул. Маякоўскага”. Работнікі МНС дасталі з вады цела грамадзяніна 1985 года нараджэння.