У Чэрвені маленькае дзіця трапіла ў рэанімацыю пасля падзення з другога паверха

16 красавіка, Позірк. У Чэрвені (Мінская вобласць) ранкам 16 красавіка дзіця, якому 1 год і 7 месяцаў, выпала з акна кватэры на другім паверсе, цяпер яно ў рэанімацыі мясцовай бальніцы, паведамляе прэс-служба Следчага камітэта.

Згодна з папярэдняй інфармацыяй, маці хлопчыка адлучылася ў прыбіральню, ненадоўга пакінуўшы таго без нагляду. Бацька дзіцяці ў гэты час яшчэ спаў. Застаўшыся адзін, малы забраўся на падваконне і, адкрыўшы створку акна, выпаў з яго.

Пабачыўшы дзіця на зямлі, бацькі адразу ж выклікалі хуткую дапамогу. Медыкі, якія прыехалі, дыягнаставалі ў хлопчыка вельмі цяжкія траўмы галавы і даставілі яго ў бальніцу.

На месца прыбыла следча-аператыўная група. Следчыя разам са спецыялістамі Дзяржкамітэта судовых экспертыз “праводзяць дбайны агляд тэрыторыі, фіксуюць усе дэталі і апытваюць відавочцаў”.

У ліпені 2025 года Генеральная пракуратура паведамляла, што ад пачатку года да таго моманту ў выніку выпадзення з вокнаў загінула шэсць дзяцей, за аналагічны перыяд 2024-га — адно дзіця.

З 1 студзеня да 30 снежня 2025 года ў Беларусі праз вонкавыя прычыны загінула 106 дзяцей.