Паслабленне цэнавага рэгулявання паскорыла інфляцыю ў Беларусі — ЕАБР

19 траўня, Позірк. У красавіку інфляцыю ў Беларусі магло паскорыць паслабленне адміністрацыйнага рэгулявання цэн, гаворыцца ў штотыднёвым макраэканамічным аглядзе Еўразійскага банка развіцця (ЕАБР).

Эксперты звяртаюць увагу, што ў рамках паслаблення быў “скарочаны пералік рэгуляваных пазіцый” і “спрошчаны парадак ўзгаднення павышэння коштаў прадпрыемствамі”.

“Інфляцыя ў Беларусі склала 6,5% (тут і далей у гадавым выражэнні. — “Позірк“.) у красавіку пасля 5,9% у сакавіку”, — канстатуецца ў аглядзе.

Адзначаецца, што рост цэн паскорыўся па ўсіх ключавых кампанентах спажывецкага кошыка, пры самым прыкметным росце кошту спажывецкіх тавараў (+8,3% у красавіку пасля +7,5% у сакавіку).

“Асноўнымі фактарамі сталі далейшае паслабленне беларускага рубля да расійскага і паскарэнне росту цэн на сезонную гародніну і садавіну”, — падкрэсліваюць эксперты.

Як паведамляў “Позірк”, спажывецкія цэны ў красавіку 2025 года выраслі на 1%, з пачатку года — на 3,8%, у гадавым вымярэнні — на 6,5%.

Пастанова Савета міністраў № 713 (6) ад 2 красавіка 2025 года скараціла спіс тавараў, якія падлягаюць цэнаваму рэгуляванню — “зыходзячы з балансу інтарэсаў дзяржавы і ўдзельнікаў спажывецкага рынку” — з 331 да 211 пазіцый (-36,3%). Урад заявіў, што рашэнне паменшыць пералік “грунтавалася на неабходнасці падтрымання ўзроўню інфляцыі і выключэнні з цэнавага рэгулявання тавараў непаўсядзённага попыту або прэміум-класа”.

МАРГ пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн: у студзені цэны не павінны былі вырасці больш, чым на 0,7% (па факце — +0, 7%), па выніках студзеня — лютага — на 1,9% (+2%), студзеня — сакавіка — на 2,2% (+2, 8%), студзеня — красавіка — на 2,7% (+3, 8%).

Далей: студзеня — траўня — 3%, студзеня — чэрвеня — 3,3%, студзеня — ліпеня і студзеня — жніўня — 3,4%, студзеня — верасня — 3,7%, студзеня — кастрычніка — 4,1%, студзеня — лістапада — 4,4%, студзеня — снежня — 5%.