21 траўня, Позірк. Перад распадам СССР на 1 млн яго насельніцтва прыходзілася 12 палітвязняў, у сучаснай Расіі гэты паказчык складае “каля трох чалавек”, у сённяшняй Беларусі — больш за 130. Такія звесткі прывяла 21 траўня ў Варшаве былая палітзняволеная, журналістка Ксенія Луцкіна на прэс-канферэнцыі, прымеркаванай да Дня салідарнасці з беларускімі палітвязнямі.
Луцкіна, як і былыя палітвязні Таццяна Якельчык і Ірына Шчасная, прымала ўдзел у мерапрыемстве ў рэжыме анлайн. Непасрэдна на прэс-канферэнцыі прысутнічалі экс-палітзняволеная, член Каардынацыйнай рады (КР) Алана Гебрэмарыям, былая палітзняволеная Вольга Філатчанкава, а таксама Яўгенія Доўгая — экс-кіраўніца ініцыятывы “Палітвязынка”, якая нядаўна заявіла пра сваё закрыццё.
Гебрамарыям адзначыла, што паводле звестак праваабарончага цэнтра “Вясна”, у Беларусі цяпер 160 жанчын-палітзняволеных, ініцыятыва Dissidentby прызнае такімі 173 чалавекі. Каля 600 жанчын са статусам палітвязняў вызваленыя ў сувязі са сканчэннем тэрміну адбыцця пакарання, паведаміла член КР.
