Анархіст-палітвязень Раманаў асуджаны на 1,5 года дадаткова за “непадпарадкаванне адміністрацыі калоніі”

25 траўня, Позірк. Актывіст анархісцкага руху, палітвязень Сяргей Раманаў асуджаны на 1,5 года пазбаўлення волі, паведамляе тэлеграм-канал “АЧК-Беларусь”.

Яго прызналі вінаватым паводле арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі).

Адзначаецца, што гэта трэці прыгавор у дачыненні да палітвязня паводле гэтага артыкула.

Цяпер агульны тэрмін зняволення Раманава складае 24 гады і 5 месяцаў, гаворыцца ў паведамленні.

“Таксама Сяргея нядаўна перавялі ў ПКТ (памяшканне камернага тыпу) і забаранілі яму маляваць. Малюнкі, якія ён адпраўляе ў лістах, не прапускаюць”, — адзначае тэлеграм-канал.

Раманаў быў затрыманы 29 кастрычніка 2020 года. Яго, а таксама Ігара Аліневіча, Дзмітрыя Дубоўскага і Дзмітрыя Рэзановіча, абвінавацілі ў падпале службовых аўтамабіляў, будынка ДАІ і Дзяржаўнага камітэта экспертыз у Гомельскай вобласці. Усе чацвёра прызнаныя вінаватымі паводле арт. 295 (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў), арт. 289 (акт тэрарызму) КК і прыгавораныя да доўгіх тэрмінаў зняволення. Прыгавор Раманава — 20 гадоў пазбаўлення волі.

Пазней палітвязня двойчы судзілі паводле арт. 411 КК, прызначыўшы дадаткова 11 месяцаў і 2 гады пазбаўлення волі.

Адбывае пакаранне ў папраўчай калоніі № 11 у Ваўкавыску (Гродзенская вобласць).