Рэгіянальны медыяпраект “Флагшток” папрасіў аб фінансавай падтрымцы

27 траўня, Позірк. Пра фінансавыя цяжкасці паведаміў 27 траўня рэгіянальны медыяпраект “Флагшток”.

Праз гэта, як адзначаецца, з 1 чэрвеня выданне будзе “вымушана працаваць у абмежаваным рэжыме”.

Рэдакцыя просіць аб падтрымцы, каб і далей паведамляць “пра ўсе падзеі” ў Гомельскай вобласці. Падкрэсліваецца, што пры пералічэнні сродкаў неабходна ўлічваць персанальныя рызыкі бяспекі.

Кантэнт інтэрнэт-рэсурсаў “Флагштока” быў прызнаны “экстрэмісцкімі матэрыяламі” ў жніўні 2022 года. 26 красавіка таго ж года Камітэт дзяржаўнай бяспекі прызнаў медыя “экстрэмісцкім фарміраваннем”.

Рэгіянальны навінавы сайт “Флагшток” быў створаны ў 2020 годзе на хвалі паспяховай грамадскай ініцыятывы, што выступіла супраць будаўніцтва ў Гомелі 60-метровага флагштока за паўмільёна долараў.

Асвятляе рэзанансныя падзеі ў рэгіёне. З 2022 года “Флагшток” публікаваў інфармацыю, звязаную з перамяшчэннем па поўдні Беларусі расійскіх войскаў, якія былі задзейнічаныя ва ўзброенай агрэсіі супраць Украіны.

Сістэмныя рэпрэсіі супраць незалежных СМІ ў Беларусі працягваюцца з 2020 года. Апошнім часам рэдакцыі ў выгнанні масава сутыкнуліся з эканамічнымі цяжкасцямі і неабходнасцю скарачаць штаты.

Пры гэтым на падтрымку прапагандысцкіх СМІ ўлады выдаткоўваюць з бюджэту больш за 145 млн рублёў штогод.

Гл. таксама:

Савет Еўропы працягне падтрымліваць беларускія незалежныя медыя — прадстаўнік СЕ

Ціханоўская: Я змагаюся за незалежныя СМІ і шукаю для іх падтрымку