Міністры абароны краін АДКБ падпісалі план вайсковай супрацы на 2026–2030 гады

28 траўня, Позірк. План развіцця вайсковай супрацы дзяржаў — членаў Арганізацыі Дагавора аб калектыўнай бяспецы (АДКБ) на 2026­–2030 гады падпісаны 28 траўня ў Бішкеку (Кыргызстан) на пасяджэнні Савета міністраў абароны краін АДКБ.

Паводле інфармацыі прэс-службы арганізацыі, кіраўнікі абаронных ведамстваў таксама падпісалі план сумеснай падрыхтоўкі органаў кіравання і фарміраванняў сіл і сродкаў сістэмы калектыўнай бяспекі АДКБ на 2026 год, метадычныя рэкамендацыі па арганізацыі іх сумеснай падрыхтоўкі, а таксама парадак распрацоўкі і афармлення “стандартных фарматаў апісання прадметаў забеспячэння” ўзброеных сіл дзяржаў АДКБ.

На пасяджэнні 28 траўня міністр абароны Віктар Хрэнін заявіў пра “зніжэнне параметраў” запланаваных на сёлетні верасень беларуска-расійскіх вайсковых вучэнняў “Захад-2025” і пераносе манеўраў ад мяжы углыб Беларусі.

У АДКБ уваходзяць Арменія, Беларусь, Казахстан, Кыргызстан, Расія і Таджыкістан, аднак армянскі міністр абароны Сурэн Папікян, мяркуючы з апублікаванай арганізацыяй пратакольнай фатаграфіі, праігнараваў пасяджэнне ў Бішкеку.

Улады Арменіі замарозілі ўдзел краіны ў АДКБ і загаварылі пра магчымы выхадзе з блока. Ерэван абвінаваціў арганізацыю ў бяздзейнасці падчас карабахскага канфлікту з Азербайджанам, а асобных членаў — у тым, што яны “планавалі вайну” супраць Арменіі разам з Баку.