Саўладальнік будынка, у якім размяшчаецца консульства Польшчы ў Гродне, асуджаны завочна на 2,5 года пазбаўлення волі

4 чэрвеня, Позірк. Суд Ленінскага раёна Гродна 30 траўня прыгаварыў 72-гадовага Станіслава Буйніцкага, саўладальніка будынка, у якім размяшчаецца консульства Польшчы, да 2,5 года пазбаўлення волі, вынікае з паведамлення праваабарончага цэнтру “Вясна”.

Мужчына прызнаны вінаватым паводле ч. 2 арт. 243 Крымінальнага кодэкса (ухіленне ад выплаты падаткаў, збораў).

Праваабаронцы адзначаюць, што Буйніцкаму прызначана 3,5 года пазбаўлення волі, але “адзін год зняты па амністыі”. Акрамя гэтага, ён аштрафаваны на 2.000 базавых велічынь (84 тыс. рублёў).

Згодна з прыгаворам, у даход дзяржавы канфіскаваны (“як сродак здзяйснення злачынства”) згаданы адміністрацыйны будынак па адрасе праспект Чэчка, 1 і 2 (да жніўня 2023 года — вул. Будзёнага, 48а).

31 студзеня паведамлялася, што Следчы камітэт пачаў спецыяльную вытворчасць у дачыненні да Буйніцкага.

У 1990-х гадах ён быў намеснікам старшыні Саюза палякаў Беларусі. З 1999 года пражываў у Беластоку — эміграваў паводле палітычных матываў і атрымаў польскае грамадзянства. Пры гэтым ён заставаўся саўладальнікам ТАА “Форт”, якому належыць будынак консульства. Раней у гэтым будынку арандавалі офісы палітычныя партыі і грамадскія арганізацыі. Пасля пачатку спецвытворчасці на нерухомасць быў накладзены арышт.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.

Актыўна выкарыстоўваецца для пераследу апанентаў рэжыму Аляксандра Лукашэнкі, якія знаходзяцца за мяжой.