Мінздароўя паведаміла пра сустрэчу з бацькамі памерлай 14-гадовай дзяўчынкі, замаўчаўшы падрабязнасці

6 чэрвеня, Позірк. Прадстаўнікі рэспубліканскага і абласнога лячэбна-кантрольных саветаў (ЛКС) сустрэліся з бацькамі 14-гадовай дзяўчынкі, якая памерла ў Ельску (Гомельская вобласць), паведамляе прэс-служба Міністэрства аховы здароўя.

Мэтай было “расказаць пра ход правядзення службовага расследавання”.

Адзначаецца, што пасля таго, як эксперты камісіі вывучаць усе даступныя матэрыялы, адбудзецца пасяджэнне рэспубліканскага ЛКС, на якім будуць абагульнены і прадстаўлены матэрыялы.

Анансаваныя “высновы па гэтым выпадку аказання меддапамогі з прадстаўленнем вынікаў экспертызы якасці надання медыцынскай дапамогі”.

Пра тое, што Мінздароўя стварыла камісію для службовага расследавання па факце смерці школьніцы, стала вядома 28 траўня.

Начальнік галоўнага ўпраўлення арганізацыі медыцынскай дапамогі Мінздароўя Леанід Недзень у відэакаментары, апублікаваным прэс-службай ведамства, адзначыў, што “групай экспертаў ведамства праводзіцца медыцынскае службовае расследаванне, вывучаюцца ўсе матэрыялы таго, што адбылося”.

Раней беларускі дэмакратычны лідар Святлана Ціханоўская, каментуючы гэтую трагедыю, заявіла, што медыцына ў краіне патрабуе неадкладных змен.

Паводле афіцыйных даных, 17 траўня цэнтральная раённая бальніца ў Ельску паведаміла мясцоваму аддзяленню міліцыі пра смерць 14-гадовай школьніцы ў рэанімацыйным аддзяленні. Следчы камітэт пачаў праверку.

Паводле наяўнай інфармацыі, у тым ліку неафіцыйнай, 16 траўня дзяўчынка накіравалася ў паліклініку закрываць бальнічны, перад гэтым яна правяла чатыры дні з кашлем і болямі ў горле. Аднак дзяўчынку вырашылі шпіталізаваць. Яе бацькам патэлефанавалі і паведамілі, што іх дачка ў рэанімацыі — у коме.

Каля 18:00 у бальніцу прыехаў рэанімабіль з Мазыра, якога чакалі каля чатырох гадзін. Дзяўчынку ён не забраў, бо лекары “вырашылі чакаць брыгаду з Гомеля”. Медыкі з абласнога цэнтра дабраліся да бальніцы каля паўночы. Праз 20 хвілін пасля іх прыезду бацькам паведамілі пра смерць дачкі.

У дзяўчынкі засталіся тры сястры і два браты. Сацыяльныя службы пасля рэзанансу ўзмацнілі ўвагу да шматдзетнай сям’і: братоў і сясцёр памерлай дзяўчынкі рэгулярна выклікаюць на гутаркі ў школе без паведамлення і прысутнасці бацькоў. Робяцца спробы ачарніць памерлае дзіця, напрыклад, распаўсюджваецца інфармацыя, што яна курыла і дрэнна сябе паводзіла.

У раённай газеце начальнік Ельскага раённага аддзялення СК Аляксей Уласенка паабяцаў даць ацэнку працы медперсаналу, прыгразіў каментатарам крымінальнай адказнасцю за паклёп і падкрэсліў “недапушчальнасць распаўсюджвання домыслаў і неправеранай кампетэнтнымі асобамі інфармацыі”.