КДБ унёс у спіс “тэрарыстаў” 15 чалавек, у тым ліку байцоў палка Каліноўскага і блогера Бяспалава

9 чэрвеня, Позірк. 15 чалавек унёс Камітэт дзяржаўнай бяспекі ў пералік “фізічных асоб, якія маюць дачыненне да тэрарыстычнай дзейнасці”, вынікае з абноўленай інфармацыі ў спецыяльным тэлеграм-канале ведамства.

Адпаведны спіс папоўнілі кіраўнікі падраздзяленняў і байцы палка Каліноўскага Вячаслаў Граноўскі (падставай уключэння ў спіс названы прыгавор, які набыў моц, паводле арт. 290⁵, 361 Крымінальнага кодэкса), Ігнат Кірэеў (арт. 290², 290⁴, 290⁵, 361 КК), Арцём Бігель (арт. 130, 290⁵, 361 КК), Ян Мельнікаў (арт. 130, 290², 290⁴, 361 КК) і Анастасія Махамет (290², 290⁴, 361 КК). Усе яны асуджаныя завочна на доўгія тэрміны пазбаўлення волі.

Таксама “тэрарыстам” прызнаны завочна асуджаны на 18 гадоў зняволення блогер і (па вызначэнні сілавых органаў) “стваральнік і кіраўнік экстрэмісцкага фарміравання “МАЯ КРАІНА БЕЛАРУСЬ” Сяргей Бяспалаў (арт. 130, 293, 361 КК).

Спіс папоўнілі палітвязні Ігар Драбышэўскі, Даніла Чыбісаў (абодва — арт. 361 КК), Дзмітрый Сончык (арт. 130 КК) і Ігар Майсеенка (арт. 130, 361 КК). Прыгаворы праваабаронцам невядомыя.

Акрамя таго, “тэрарыстамі” прызнаныя Аляксандр Гаршуноў, Лідзія Гарохава, Алег Ерашэнкаў (усе прыгавораныя паводле арт. 361 КК), Крысціна Лапкоўская (арт. 130 КК) і Арцём Кухаронак (арт. 130, 361 КК).

У “спісе тэрарыстаў” 1.410 пазіцый, 1.299 чалавек, з іх 604 — грамадзяне Беларусі. Абвешчаным “тэрарыстамі” зняволеным забаронена атрымліваць грашовыя пераводы.

Даведка “Позірку”:

арт. 130 Крымінальнага кодэкса — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 290² — садзейнічанне тэрарыстычнай дзейнасці;

арт. 290⁴ — стварэнне арганізацыі для ажыццяўлення тэрарыстычнай дзейнасці або ўдзел у ёй;

арт. 290⁵ — арганізацыя дзейнасці тэрарыстычнай арганізацыі і ўдзел у дзейнасці такой арганізацыі;

арт. 293 — масавыя беспарадкі;

арт. 361 — заклікі да мер абмежавальнага характару (санкцый), іншым дзеянням, накіраваным на прычыненне шкоды нацыянальнай бяспекі.