Загарэлася электраабсталяванне ў цягніку гомельскіх рэгіянальных ліній

23 чэрвеня, Позірк. Узгаранне электраабсталявання ў трэцім вагоне цягніка рэгіянальных ліній эканомкласа № 6427 Жлобін — Калінкавічы здарылася 23 чэрвеня ў 18.55 на перагоне Астанкавічы — Халаднікі (Гомельская вобласць), паведаміла Беларуская чыгунка (БЧ).

Адзначаецца, што ўзгаранне ліквідаванае сіламі лакаматыўнай брыгады.

На момант надзвычайнага здарэння ў цягніку знаходзілася 30 пасажыраў, ніхто з іх не пацярпеў, адзначыла БЧ.

“З прычыны інцыдэнту цягнік прыбудзе на канчатковую станцыю з затрымкай арыентоўна 1 гадзіна 25 хвілін. Беларуская чыгунка прымае аператыўныя меры па дастаўцы пасажыраў да месцаў прызначэння”, — гаворыцца ў паведамленні.

26 красавіка здарыўся пажар у машынным аддзяленні дызель-цягніка Орша — Крычаў, пацярпелых не было.