Плошча пабудаванага з дзяржпадтрымкай жылля для маючых патрэбу зменшылася за чатыры гады на 44%
23 ліпеня, Позірк. Агульная плошча ўведзенага ў эксплуатацыю жылля для грамадзян, якія стаяць на ўліку маючых патрэбу, за чатыры гады паменшылася на 33,6% (з 861.795 квадратных метраў за студзень — чэрвень 2021-га да 571.824 кв. м за аналагічны перыяд 2025-га), вынікае з праведзенага “Позіркам” аналізу даных Нацыянальнага статыстычнага камітэта.
З выкарыстаннем дзяржаўнай падтрымкі за названы перыяд уведзена на 44,4% менш (з 632.496 да 351.973).
Дадзеныя паказчыкі знізіліся ва ўсіх рэгіёнах і сталіцы:
Брэсцкая вобласць — на 36,4% (з 215.649 да 137.086) і на 32,9% (з 149.269 да 100.213) адпаведна;
Віцебская вобласць — на 35% (з 42.820 да 27.834) і на 34,5% (з 34.098 да 22.338);
Гомельская вобласць — на 32,3% (з 132.496 да 89.748) і на 52,7% (з 94.992 да 44.910);
Гродзенская вобласць — на 49,1% (з 133.823 да 68.113) і на 48,4% (з 107.888 да 55.618);
Мінская вобласць — на 32,9% (з 199.245 да 133.687) і на 41,5% (з 123.234 да 72.107);
Магілёўская вобласць — на 6,4% (з 56.549 да 52.937) і ў 3,4 раза (з 50.375 да 14.813);
Мінск — на 23,1% (з 81.213 да 62.419) і на 42,2% (з 72.640 да 41.974).
На нарадзе з урадам 19 жніўня 2024 года Аляксандр Лукашэнка заявіў, што ў “справаздачах аналітыкаў” адной з першых прычын адтоку кадраў з невялікіх населеных пунктаў называецца “адсутнасць магчымасці набыць уласнае жыллё ці хаця б засяліцца ў арганізаванае камфортнае і добраўпарадкаванае арэнднае жыллё”.
Нагадаўшы аб сваім даручэнні “комплексна падысці да паляпшэння заканадаўства” ў галіне жыллёвага будаўніцтва, ён канстатаваў, што “статыстыка па ўводу жылля другі год запар адмоўная”.
Заслухоўваючы 15 кастрычніка 2024 года даклад аб удасканаленні сацыяльнай падтрымкі насельніцтва, Лукашэнка адзначыў: “Мы будзем падтрымліваць тых, хто нараджае дзяцей, асабліва ў каго пяцёра дзетак і больш”.
“Па жыллі мы 100% вырашым пытанне, а гэта — найважнейшае пытанне”, — сказаў ён.
У 2025 годзе ў Беларусі павінна быць пабудавана 4,5 млн кв. м жылля, вынікае з задання ўрада.
Больш за ўсё жылля павінна быць узведзена ў Мінскай вобласці — 1.325 тыс. кв. м (з улікам 18,9 тыс. кв. м, якія будуць пабудаваныя ў гарадах-спадарожніках).
Далей ідуць: Мінск — 710 тыс. кв. м, Брэсцкая вобласць — 625,9 тыс., Гомельская — 565 тыс., Гродзенская — 456,1 тыс., Магілёўская — 418 тыс., Віцебская — 400 тыс.
У 2024 годзе ў краіне павінна было быць пабудавана 4,4 млн кв. м жылля (цяпер запланавана павелічэнне на 2,3%). Паводле звестак Белстата, за студзень — снежань было ўведзена ў эксплуатацыю 4 млн 390 тыс. 544 кв. м (99,8% ад плана).
У 2023-м пры заданні ў 4,3 млн кв. м пабудавана 4 млн 195 тыс. 92 кв. м (97,6%), 2022-м — 4,2 млн кв. м і 4 млн 222 тыс. 619 кв. м адпаведна (100,5%).
