Вайскоўцы ўнутраных войскаў МУС удзельнічаюць у сельскагаспадарчых работах у Шклоўскім раёне
27 ліпеня, Позірк. Асабісты склад унутраных войскаў МУС “аказвае дапамогу” ААТ “Александрыйскае” (Шклоўскі раён Магілёўскай вобласці) “пры правядзенні сельскагаспадарчых работ”, паведамляе ведамасны тэлеграм-канал.
“Яшчэ летась у брыгадзе набіралі людзей, якія ўмеюць кіраваць тэхнікай. Я адгукнуўся і вырашыў прымяніць свае ўменні ў справе. Мы знаходзімся тут з сакавіка, калі пачалася пасяўная. Ставяцца да нас вельмі добра. Мне, напрыклад, даверылі новы камбайн”, — заявіў сяржант Аляксандр Максімовіч з вайсковай часці 5448.
Адзначаецца, што “ўклад вайскоўцаў у напаўненне засекаў па вартасці ацэнены кіраўніцтвам арганізацыі”.
“Гэтыя людзі — надзейныя абаронцы Айчыны, а цяпер зарабляюць славу выдатных хлебаробаў, якія паказваюць добрыя паказчыкі падчас уборачнай кампаніі. У сувязі з гэтым хочацца выказаць падзяку намесніку міністра ўнутраных спраў — камандуючаму ўнутранымі войскамі генерал-маёру Мікалаю Карпенкову за аказаную падтрымку і ўзаемадзеянне”, — адзначыў намеснік дырэктара па ідэалагічнай і кадравай рабоце сельгаспрадпрыемства Андрэй Гудына.
Паводле яго слоў, “адметнымі рысамі байцоў войскаў правапарадку з’яўляюцца добрасумленнае стаўленне да працы і высокая зацікаўленасць у выніку”.
У публікацыі таксама прыводзіцца выказванне старэйшага прапаршчыка Аляксандра Волкава з в/ч 6713: “На дадзены момант мы займаемся ўборкай збожжавых, ажыццяўляем рамонт і абслугоўванне тэхнікі, уносім арганічныя ўгнаенні ў глебу. А затым будзем прыступаць да сяўбы азімых. На гэтай зямлі змагаюцца за ўраджай хлопцы з вайсковых частак 5448, 3310, 6713, 7434, 5526 і 5525. Яны ставяцца да справы з поўнай самааддачай і кожную раніцу рвуцца ў бой, каб унесці сваю лепту ў забеспячэнне харчовай бяспекі краіны”.
“Асабліва ганарова”, паводле сцвярджэння Волкава, “прыбіраць хлеб на малой радзіме кіраўніка дзяржавы”, бо гэта — “сімвал даверу, і вайскоўцы, разумеючы высокую адказнасць, прыкладаюць яшчэ больш намаганняў, каб апраўдаць яго”.
Вайскоўцы ўнутраных войскаў МУС рэгулярна ўдзельнічаюць у сельгасработах на ААТ “Александрыйскае”. Год таму, у прыватнасці, яны збіралі рапс.
Прагназуемы валавы збор збожжа і збожжавых культур можа скласці каля 11 млн тон — “па запэўненні ўрада”, заявіў Аляксандр Лукашэнка 18 ліпеня падчас селектарнай нарады па пытаннях уборачнай кампаніі 2025 года.
Паводле слоў Лукашэнкі, гэта “трэба яшчэ без страт сабраць”.
“У вытворчасці прадукцыі сельскай гаспадаркі за паўгоддзе мы бачым недабор крыху больш за 2% да ўзроўню мінулага года. Так, уніз нас цягне вырошчванне свінапагалоўя, слабыя тэмпы нарыхтоўкі кармоў. Але неабходна не дапусціць падзення паказчыкаў па выніках года і пастарацца кампенсаваць недабор за кошт раслінаводчай прадукцыі”, — заявіў Лукашэнка.
Паводле звестак Белстата, у 2024 годзе валавы збор збожжавых і зернебабовых культур склаў 8,3 млн т (+8,8%). У 2023 годзе валавы збор збожжавых і зернебабовых культур склаў 7,7 млн тон, годам раней — 8,7 млн.
Раней Мінсельгасхарч паведамляў, што ў бягучым годзе сельскагаспадарчыя арганізацыі і сялянскія (фермерскія) гаспадаркі павінны забяспечыць вытворчасць збожжа ў аб’ёме 9,92 млн т.
Замаразкі ў траўні “зрабілі сваю брудную справу, нанёсшы нейкую шкоду пасевам”, аднак сітуацыя не крытычная, “катастрофы няма”, заявіў Лукашэнка 22 траўня.
Пра тое, што замаразкі сёлета ўвесну нанеслі істотную шкоду сельгаскультурам, 21 траўня сказаў намеснік прэм’ер-міністра Юрый Шулейка. Паводле яго сцвярджэння, “старажылы не памятаюць такіх умоў надвор’я”.
Намеснік кіраўніка Мінсельгасхарча Уладзімір Гракун 30 траўня заявіў, што нягледзячы на замаразкі, якія прывялі да гібелі пасеваў, ведамства разлічвае атрымаць ураджай збожжавых, цукровых буракоў, лёну, бульбы, агароднінных культур у аб’ёмах, “зацверджаных урадам”.
