10 жніўня, Позірк. Пра паездку ў Маскву дзяцей з ваенна-патрыятычнага клуба “Адзінства” паведамляе ведамасная газета МУС “На варце”.
Адзначаецца, што “сертыфікат на паездку” клубу ўручыў старшыня Астравецкага райвыканкама (Гродзенская вобласць) Сяргей Мядзвецкас на падвядзенні вынікаў навучальнага года.
“Начная і дзённая экскурсіі па расійскай сталіцы, наведванне Крамля і Краснай плошчы, кінастудыі “Масфільм”, музея-запаведніка “Царыцына” і мемарыяльнага комплексу “Патрыёт”, шпацыр па ВДНГ, знаёмства з Маскварыумам — кожная лакацыя пакінула яркі след у сэрцах рабят”, — гаворыцца ў паведамленні.
Клуб “Адзінства” створаны ў 2021 годзе ў Астраўцы на базе сярэдняй школы №3 пры падтрымцы вайсковай часці 7434. Як паведамляла раённае дзяржвыданне “Астравецкая праўда”, у клубе займаецца 68 дзяцей ва ўзросце 11–14 гадоў.
На лістапад 2024 года ў сістэме Міністэрства ўнутраных спраў функцыянавала 159 ваенна-патрыятычных клубаў, дзе займалася больш за 5,5 тыс. дзяцей.
“Ваенна-патрыятычныя заняткі” з дзецьмі праводзяць дзейныя афіцэры, прапаршчыкі, кантрактнікі, а таксама вайскоўцы тэрміновай службы, заяўляў намеснік камандуючага ўнутранымі войскамі МУС Дзмітрый Мікша. “Асноўны ўпор” пры правядзенні гэтых заняткаў, паводле яго сцвярджэння, зроблены на тактычную, інжынерную і агнявую падрыхтоўку, ваенную тапаграфію, рукапашны бой.
20 лістапада мінулага года начальнік аддзела ўпраўлення маральна-псіхалагічнага забеспячэння галоўнага ўпраўлення ідэалагічнай працы Міністэрства абароны Уладзімір Ігнацік паведамляў, што ва ўстановах агульнай сярэдняй адукацыі Беларусі дзейнічае 155 ваенна-патрыятычных класаў.
У чэрвені 2024 года міністр адукацыі Андрэй Іванец заяўляў, што праца для “патрыятычнага, грамадзянскага выхавання” ў Беларусі “сёння пачынаецца ў дзіцячым садку”.
Улады ўзмацнілі ідэалагізацыю адукацыі пасля прэзідэнцкіх выбараў 2020 года, імаверна, ацаніўшы масавасць маладых нелаяльных грамадзян, якія ўдзельнічалі ў пратэстах.
