Місію дэмакратычнай Беларусі ў Кіеве узначаліла Святлана Шаціліна (дапоўнена)

10 жніўня, Позірк. Місію дэмакратычнай Беларусі ў Кіеве узначаліла Святлана Шаціліна. Прызначэнне абвесціла дэмакратычны лідар Святлана Ціханоўская падчас канферэнцыі “Новая Беларусь” 10 жніўня ў Варшаве.

Яна “будзе разбудоўваць беларуска-ўкраінскія адносіны і дапамагаць беларусам ва Ўкраіне”, сказала Ціханоўская.

Папярэднік Шацілінай Генадзь Манько працягне працаваць у камандзе з ёй, а таксама як дэлегат Каардынацыйнай рады, дадала палітык. Паводле дэмлідара, новая прадстаўніца ва ўкраінскай сталіцы будзе каардынаваць працу з прадстаўніком Аб’яднанага пераходнага кабінета па нацыянальнай бяспецы Вадзімам Кабанчуком.

Змены ў кіраўніцтве кіеўскага офіса Ціханоўская анансавала 8 жніўня.

Аліса Рыжычэнка, рэкамендаваная раней на пасаду прадстаўніцы Аб’яднанага пераходнага кабінета па эканоміцы Каардынацыйнай радай, атрымала прызначэнне.

“Яна мае для гэтай пасады як досвед, так і дадатковыя веды, але і энергію. І я хацела б каб у бліжэйшы час прадстаўніцтва па эканоміцы паміж іншым папрацавала над дэталізацыяй усеабдымнага плану эканамічнай дапамогі Беларусі пасля дэмакратычных перамен у 3 млрд еўра”, — сказала Ціханоўская.

На пасаду прадстаўніка АПК па нацыянальным адраджэнні прызначаны філосаф Павел Баркоўскі, які быў выканальнікам абавязкаў. Яго намеснікамі сталі эксперт па адукацыі Андрэй Лаўрухін і журналістка Ірэна Кацяловіч.

Ціханоўская анансавала адкрыццё Цэнтра беларускай дэмакратічнай супольнасці ў Фларэнцыі пры падтрымцы мясцовых уладаў: “Ён будзе займацца дапамогай беларусам, падтрымкай уцекачоў, прамоцыяй беларускай культуры. Кіраваць цэнтрам будзе прадстаўніца “Народных амбасадаў” у Італіі Юлія Юхно”.

Місію дэмакратычнай Беларусі плануецца адкрыць у Іспаніі, дадала палітык: “Цяпер мы чакаем афіцыйнага пацверджання ад іспанскіх уладаў”. На чале місіі будзе стаяць сузаснавальніца стартап-хаба “Імагуру” Таццяна Марыніч.

Такім чынам, гэта будзе пятае падобнае прадстаўніцтва пасля Бельгіі, Чэхіі, Украіны і Эстоніі.

“І ўрэшце ў Брусэлі мы плануем запусціць Беларускі грамадскі хаб на базе місіі ў Брусэлі, якой кіруе Ўладзімір Астапенка”, — адзначыла дэмлідар.

На канферэнцыі прынятыя дзевяць рэзалюцый (пакуль не апублікаваныя): “Аб дасягненні справядлівасці”; “Аб вызваленні палітвязняў”; па пытаннях бяспекі; “Аб моладзі”, “Аб еўрапейскім выбары”; у падтрымку нацыянальнай ідэнтычнасці; “Аб супрацьдзеянні гібрыднай агрэсіі з боку Расіі”; “Аб недапушчальнасці парушэння свабоды сумлення” і асноўная палітычная рэзалюцыя з пазіцыямі дэмсілаў.

Узгадваючы прапанаваную АПК канцэпцыю круглага стала “для выхаду з палітычнага крызісу ў Беларусі”, Ціханоўская сказала: “Мы звяртаемся да чыноўнікаў, грамадскіх рухаў, якія падзяляюць каштоўнасці суверэнітэту і дэмакратыі, і заклікаем іх да дыялогу. Рэжым не вечны, і нам цяпер ужо трэба думаць, як рухацца да нацыянальнага прымірэння”.