Ва Украіне спынена перапраўка ў краіны ЕС праз Беларусь ваеннаабавязаных

14 жніўня, Позірк. Ва Украіне спынена перапраўка праз Беларусь у краіны ЕС ваеннаабавязаных мужчын, паведамляе ў “Фэйсбуку” Заходняе рэгіянальнае ўпраўленне Дзяржпагранслужбы краіны.

Па падазрэнні ў незаконнай дзейнасці затрыманы 53-гадовы жыхар Луцка і дзве жыхаркі Камень-Кашырскага і Луцкага раёнаў (Валынская вобласць).

Паводле звестак Дэпартамента ўнутранай бяспекі Нацыянальнай паліцыі Украіны, за перапраўку аднаго чалавека кінулася плата ў памеры 12,5 тыс. долараў (пагранслужба назвала суму на тысячу долараў большую. — “Позірк”.).

Следчыя ўстанавілі, што ў адным з выпадкаў арганізатар уласнаручна даставіў мужчыну ў сяло ў Камень-Кашырскім раёне і загадаў чакаць на аўтобусным прыпынку, адкуль яго на іншай машыне жанчыны адвезлі да мяжы з Беларуссю, абыходзячы блокпасты.

Па дарозе мужчыну праінструктавалі, далі новы тэлефон і арганізоўвалі відэазванок з чалавекам у Беларусі, які павінен быў сустрэць і дапамагчы дабрацца да ЕС, гаворыцца ў публікацыі.

Усе трое затрыманых з`яўляюцца падазраванымі паводле ч. 3 арт. 332 (незаконная перапраўка асоб праз дзяржаўную мяжу) Крымінальнага кодэкса Украіны. Ім пагражае да дзевяці гадоў пазбаўлення волі.

Аб затрыманні жыхара Славуціча (Кіеўская вобласць), які дапамагаў ваеннаабавязаным пакідаць краіну праз мяжу з Беларуссю, паведамляла Нацыянальная паліцыя Украіны ў лістападзе мінулага года.

Поўнамаштабная вайна ва Украіне, развязаная Крамлём у лютым 2022 года, адбываецца пры падтрымцы рэжыму Аляксандра Лукашэнкі.