Для дзяцей палітвязняў сабрана да пачатку навучальнага года амаль 20 тыс. еўра — BySol

5 верасня, Позірк. Пра завяршэнне збору для дзяцей палітвязняў, прымеркаванага да пачатку навучальнага года, паведаміў 5 верасня фонд салідарнасці BySol.

Сабрана 19.951 еўра з заяўленых 26.080, вынікае з інфармацыі на сайце фонду.

У тэлеграм-канале BySol гаворыцца, што сабраныя сродкі пойдуць на “дапамогу для 250 дзяцей палітвязняў і вызваленых”.

На сайце фонду ўказана, што сродкі сабраныя для 172 дзяцей з 253.

“Мы дзякуем кожнаму і кожнай, хто зрабіў свой унёсак у гэты збор! Дзякуючы вам дзеці палітвязняў ужо атрымалі або атрымаюць у бліжэйшы час выплаты па 100 еўра — гэтыя грошы звычайна ідуць на куплю школьных прылад”, — паведаміў BySol.

Падкрэсліваецца, што канчатковая сума, неабходная для задавальнення ўсіх заявак складае 26 тыс. еўра. “Мы бяром на сябе абавязак знайсці магчымасць з дапамогай партнёраў і донараў сабраць поўную суму, каб ніхто з дзяцей не застаўся без падтрымкі”, — адзначылі ў арганізацыі.

Увесну фонд сабраў больш за 25 тыс. еўра для арганізацыі летняга адпачынку для дзяцей палітвязняў і экс-палітвязняў. На кожнае дзіця да 16 гадоў таксама выплачвалася дапамога ў памеры 100 еўра.