МНС паведаміла пра адсутнасць пацярпелых пасля навальнічнага фронту ў Глускім і Кіраўскім раёнах

18 жніўня, Позірк. Супрацоўнікі Міністэрства па надзвычайных сітуацыях ліквідуюць наступствы непагадзі ў Кіраўскім і Глускім раёнах Магілёўскай вобласці, паведаміла 18 жніўня прэс-служба ведамства.

Адзначаецца, што ў выніку праходжання навальнічнага фронту 16 жніўня ў гэтых раёнах пашкоджана 12 аб’ектаў. “У Глуску пацярпелі тры прыватныя жылыя дамы, у Кіраўску пашкоджаныя пяць прыватных жылых дамоў, адзін сельскагаспадарчы аб’ект, адзін вытворчы аб’ект, два аб’екты сацыяльнага прызначэння (пошта і сярэдняя школа). Іншыя пашкоджанні высвятляюцца”, — гаворыцца ў паведамленні.

“Пацярпелых няма, — падкрэслівае міністэрства. — На працягу ўсяго ўчорашняга дня работнікі МНС і камунальныя службы праводзілі работы па распілоўцы і ўборцы паваленых дрэў”.

17 жніўня паведамлялася аб пашкоджанні дамоў у Брэсцкай і Магілёўскай вобласці ў выніку праходжання напярэдадні навальнічнага фронту.

У Брэсцкай вобласці закрануты аграгарадок Жыдчэ Пінскага раёна, у Магілёўскай — раённы цэнтр Кіраўск і аграгарадок Заеліца Глускага раёна.

Аб навальніцах і ветры парывамі да 15–20 метраў за секунду 16 жніўня папярэдзіў Белгідрамет.