Ціханоўская абмеркавала з прадстаўнікамі ЕС вызваленне палітвязняў, Украіны — супрацоўніцтва з парламентам

30 жніўня, Позірк. Крокі для вызвалення беларускіх палітвязняў абмеркаваны на сустрэчы Святланы Ціханоўскай з міністрам замежных спраў Даніі Ларсам Лёке Расмусенам і вярхоўным прадстаўніком ЕС па замежнай палітыцы і бяспецы Каяй Калас у Капенгагене, паведамляе прэс-служба дэмлідара.

Ціханоўская падкрэсліла “неабходнасць каардынацыі намаганняў трансатлантычных партнёраў і развіцця праграмаў рэабілітацыі для тых, хто выходзіць на волю”.

“Важнае пытанне — удзел рэжыму ў агрэсіі [супраць Украіны] і будучых вучэнняў “Захад-2025″. Абмяркоўвалася ўзмацненне ціску на Лукашэнку”, — гаворыцца ў рэлізе.

Таксама шла гаворка аб прыцягненні рэжыму да адказнасці за злачынствы супраць чалавечнасці.

Палітык “акцэнтавала ўвагу на пагрозе страты дзяржаўнасці праз павелічэнне расійскай прысутнасці” ў Беларусі.

Акрамя таго, яна “распавяла пра пераслед сем’яў палітвязняў, трансгранічны ціск і знікненні актывістаў”.

Ціханоўская заклікала выпрацаваць “агульнае еўрапейскае рашэнне [па легалізацыі] для людзей, якія праз рэпрэсіі вымушаныя жыць у Еўропе з часовымі дакументамі”.

Дэмлідар звярнула ўвагу на важнасць падтрымкі беларускіх СМІ, праваабаронцаў і культурніцкіх ініцыятыў з боку ЕС як “асновы дэмакратычнага руху”.

“Я ўдзячная Каі Калас і ўраду Даніі за лідарства ў падтрымцы Беларусі. Еўропа павінна заставацца прынцыповай і паслядоўнай у сваёй палітыцы. Вызваленне палітвязняў — наш прыярытэт, і гэта першы крок да больш сістэмных зменаў”, — заявіла палітык.

Таксама Ціханоўская сустрэлася з кіраўніком камітэта па замежных справах Вярхоўнай Рады Украіны Аляксандрам Мярэжкам, паведаміў “Позірку” яе галоўны дарадца Франак Вячорка.

Бакі абмеркавалі перспектывы супрацоўніцтва паміж дэмакратычнымі сіламі Беларусі і Вярхоўнай Радай Украіны і групай “За дэмакратычную Беларусь” у ёй.

Ціханоўская нагадала, што ў жніўні прызначыла Святлану Шаціліну кіраўніком місіі дэмакратычнай Беларусі ў Кіеве, яна “будзе займацца камунікацыяй з уладамі, грамадзянскай супольнасцю і беларускай дыяспарай ва Украіне”.

“У дзень памяці абаронцаў Украіны (29 жніўня. — “Позірк”.) яна выказала словы спачування народу Украіны ў сувязі з гібеллю мірных жыхароў у выніку расійскіх ракетных удараў”, — сказаў Вячорка.

З 2014 года ў змаганні за Украіну загінула больш за 80 беларусаў, нагадала Ціханоўская: “Мы памятаем адважных добраахвотнікаў і полк Каліноўскага, і ўсіх, хто працягвае змагацца за свабоду. Украіна змагаецца і за нашу свабоду таксама”.

Палітык наведала Данію 28–29 жніўня разам з мужам, экс-палітвязнем Сяргеем Ціханоўскім.