У Літве перахопленыя дзве буйныя партыі беларускіх цыгарэт, праз мяжу іх пераправілі па паветры

4 верасня, Позірк. У ноч на 3 верасня памежнікі Літвы перахапілі 20 тыс. пачкаў кантрабандных беларускіх цыгарэт, якія перапраўляліся праз беларуска-літоўскую мяжу па паветры — у 40 скрынках двума партыямі.

Як паведаміла Служба аховы дзяржаўнай мяжы (САДМ) Літвы, кошт грузу, уключаючы падаткі, перавысіў 100 тыс. еўра.

У першую партыю ўваходзіла 19 скрынак цыгарэт NZ Gold з беларускімі акцызнымі маркамі, кантрабанда транспартавалася ў мяшку з дапамогай шасці паветраных шароў і была перахопленая неўзабаве пасля паўночы.

Пазней быў знойдзены аналагічны мяшок з 21 скрынкай, таксама прымацаваны да шасці паветраных шароў.

Паведамляецца, што САДМ праводзіць дасудовае расследаванне па факце незаконнай рэалізацыі акцызных тавараў. За падобнае злачынства прадугледжаны штраф або пазбаўленне волі на тэрмін да васьмі гадоў.

Паводле звестак памежнай службы, сёлета ў Літве перахоплена 420 партый цыгарэт, дастаўленых на паветраных шарах з Беларусі. Летась такіх выпадкаў было 226. У 2022 годзе выпадкаў кантрабанды з Беларусі на паветраных шарах не зафіксавана, а ў 2023 годзе было ўсяго 3 спробы.

Акрамя таго, сёлета памежнікі затрымалі 86 чалавек, якія падазраюцца ў дачыненні да паветранай кантрабанды, адзначае САДМ.