Ціханоўская заклікала краіны Паўночнай Еўропы і Балтыі ціснуць на рэжым Лукашэнкі да сістэмных змен у Беларусі
Сцягі краін Паўночнай Еўропы і Балтыі
13 верасня, Позірк. Не спыняць ціск на рэжым Аляксандра Лукашэнкі да тае пары, пакуль у Беларусі не адбудуцца сістэмныя змены, заклікала дэмакратычны лідар Святлана Ціханоўская на сустрэчы з амбасадарамі і спецпасланнікамі краін Паўночнай Еўропы і Балтыі, паведаміў “Позірку“ галоўны дарадца палітыка Франак Вячорка.
Паводле яго слоў, у сустрэчы, якая адбылася 11 верасня ў Вільнюсе з ініцыятывы фінскай амбасады, узялі ўдзел дыпламаты з Даніі, Ісландыі, Латвіі, Літвы, Нарвегіі, Фінляндыі, Швецыі ды Эстоніі.
На сустрэчы бакі абмеркавалі пытанні палітвязняў і іх падтрымкі пасля вызвалення; падтрымкі незалежных СМІ, культурніцкіх і грамадскіх ініцыятыў; рэпрэсій ў Беларусі і прыцягнення рэжыму Лукашэнкі да адказнасці; санкцыйнай палітыкі і бяспекі рэгіёну.
