У Польшчы ліквідаваная група, якая пастаўляла ў Беларусь і РФ аўтамабілі люкс-класа ў абыход санкцый
23 верасня, Позірк. Ліквідаваная арганізаваная злачынная група, якая пастаўляла аўтамабілі люкс-класа ў Беларусь і Расію ў абыход санкцый, паведаміла 23 верасня Цэнтральнае следчае бюро паліцыі (ЦСБП) Польшчы.
Паводле інфармацыі ведамства, паліцэйскія ЦСБП “пад наглядам рэгіянальнай пракуратуры ў Любліне” затрымалі ў другой палове верасня 20 чалавек, якія, як мяркуецца, удзельнічалі ў гэтай групе.
“Група дзейнічала на тэрыторыі некалькіх еўрапейскіх краін, займаючыся фіктыўным абаротам аўтамабіляў класа “люкс” і махлярствам з вяртаннем ПДВ, — гаворыцца ў паведамленні. — Насуперак санкцыям ЕС каля 600 аўтамабіляў было накіравана ў Расію і Беларусь”.
Расследаванне тычыцца дзеянняў групы ў 2021–2025 гадах у Германіі, Літве, Польшчы, Чэхіі ды іншых краінах Еўропы. Удзельнікі гэтай супольнасці, як сцвярджаецца, выкарыстоўвалі падстаўных асоб, на якіх “рэгістраваліся фірмы і гаспадарчая дзейнасць для падаўжэння ланцужкоў транзакцый і ўтойвання іх злачыннага характару”.
“Група набывала ў аўтасалонах аўтамабілі прэміяльных марак — BMW, Mercedes, Porsche, Lexus, Range Rover, — адзначае ЦСБП. — Затым машыны перапрадаваліся іншым фірмам і паступалі да пакупнікоў у краінах ЕС. Адтуль яны зноў дастаўляліся ў Польшчу, каб у выніку — з парушэннем санкцый — прадаць іх у Расію і Беларусь, галоўным чынам праз беларускія, азербайджанскія і казахскія кампаніі”.
Падкантрольныя групе кампаніі, паводле даных ведамства, атрымалі “неабгрунтаванае вяртанне ПДВ на суму больш за 40 млн злотых” (больш як 11 млн долараў паводле актуальнага курсу Нацбанка Польшчы).
Затрыманым выстаўленыя абвінавачанні, “у тым ліку ва ўдзеле ў арганізаванай злачыннай групе, выстаўленні фіктыўных рахункаў-фактур па ПДВ агульным коштам звыш 17 млн злотых” (4,7 млн долараў), “адмыванні грошай і абходзе санкцый, уведзеных супраць Расіі і Беларусі”.
Абвінавачанні ў кіраўніцтве групай выстаўленыя траім фігурантам, двое з іх узятыя пад варту на тры месяцы.
“У ходзе следчых дзеянняў былі вынятыя элітныя гадзіннікі, ювелірныя вырабы і наяўныя грошы ў розных валютах. Генеральны інспектар фінансавай інфармацыі таксама заблакаваў сродкі на банкаўскіх рахунках падазраваных — агулам больш за 10 млн злотых (2,8 млн долараў. — “Позірк”.). Злачынствы, якія ставяцца ў віну членам групы, уключаючы некаторыя кваліфікаваныя як цяжкія, караюцца пазбаўленнем волі на тэрмін ад 5 гадоў, а таксама вялікімі штрафамі”, — гаворыцца ў паведамленні.
У чэрвені 2024 года ЕС пашырыў санкцыі ў дачыненні да Беларусі, распаўсюдзіўшы забарону на пастаўку ў тым ліку на прадметы раскошы, да якіх адносяцца і аўтамабілі люкс-класа.
